काठमाडौं । राष्ट्रिय पुरुष भलिबल टिमका स्पाइकर मानबहादुर श्रेष्ठले माल्दिभ्सको भलिबल लिग खेल्ने भएका छन् ।
माल्दिभ्सको राजधानी मालेमा भोलिबाट सुरु हुने लिगमा मानबहादुले गुडिस स्पोर्ट्स क्लबबाट खेल्ने छन् । लिगका लागि मानबहादुर आज (मंगलबार) राति ८ बजे त्यसतर्फ प्रस्थान गर्नेछन् ।
लिगको लागि क्लबले अनुरोध गरेका कारण माल्दिभ्स जान लागेको मानबहादुरले खेलपाटीलाई बताए ।
‘अहिले भलिबलबाट धेरै टाढा छु । खेलेको पनि छैन,' मानबहादुरले भने, 'तर, माल्दिभ्सले नेपालबाट लिगको लागि मलाई अनुरोध गर्यो त्यसैले जान लागेको छु ।’
उनले माल्दिभ्सको लिगले राष्ट्रिय टिममा पुनरागमन गर्न सजिलो हुने समेत बताए ।
‘धेरै समय भलिबलबाट टाढा भएको छु । आशा छ यो लिगले भलिबलमा पुनरागमन हुन सजिलो हुनेछ,’ मानबहादुरले थपे ।
मानबहादुरले अनुबन्ध रकम भने माल्दिभ्स पुगेपछि मात्र तय हुने बताए ।
मानबहादुरको टिम गुडिसले भोलि (बुधबार) पहिलो खेलमा स्पोर्ट्स क्लब हक्कसको सामना गर्नेछ ।
माल्दिभ्स भलिबल लिगमा सहभागी टिमले दुई विदेशी खेलाडी राख्न पाइने प्रावधान रहेको छ । जसमा गुडिसले मानबहादुर र पाकिस्तानका खेलाडीलाई टिममा अनुबन्ध गरेको छ ।
मानबहादुरले यसअघि सन् २०१८ मा माल्दिभ्सको लिग सिटी स्पोर्ट्स क्लबबाट खेलिसकेका छन् ।
माल्दिभ्सको लिग डिसेम्बर २५ देखि जनवरी १२ सम्म चल्नेछ ।
खेल तालिका :
-1751593454.webp)
