काठमाडौं । सहिद स्मारक 'ए' डिभिजन लिग फुटबलमा विभागीय टिम शसस्त्र प्रहरीको एपीएफ र हिमालयन शेर्पाले बराबरी खेल्दै अबका बाडेका छन् ।
त्रिपुरेश्वरस्थित दशरथ रंगशालामा आइतबार एपीएफ र शेर्पाले १-१ गोलको बराबरी खेल्दै अंक बाडेका हुन् ।
पहिलो हाफ गोलरहित बराबरीमा सकिएको खेलमा शेर्पाले सुरुवाती अग्रता बनाएको थियो ।
खेलको ४७ औं मिनेटमा त्रिदेभ गुरुङले गोल गर्दै शेर्पालाई अग्रता दिलाएका थिए । तर, पहिलोपटक दुई विदेशी खेलाडीसहित मैदान उत्रिएको शेर्पाले उक्त अग्रता धेरै बेर जोगाउन सकेन ।
खेलको ५८ औं मिनेटमा आशिष लामाको क्रसमा प्रविन कुमार स्याङतेनले गोल गर्दै एपीएफलाई खेलमा फर्काए ।
खेलमा शेर्पाका त्रिदेभ म्यान अफ दि म्याच चुनिए ।
यो बराबरीसँगै एपीएफले लिगमा पहिलो अंक जोडेको छ । एपीएफले २ खेलमा १ अंक जोडेको हो ।
पहिलो खेलमा एपीएफ मनाङ मर्स्याङ्दी क्लबसंग २-० ले पराजित भएको थियो ।
शेर्पाले भने दुई खेलमा २ अंक जोडेको छ । पहिलो खेलमा शेर्पा नेपाल पुलिस क्लबसँग गोलरहित बराबरी खेलेको थियो ।
एपीएफको पकड :
शेर्पाविरुद्धको खेलमा एपीएफले अधिकांस समय पकड जमाएको थियो । यस्तै गोलको अवसर समेत बनाएको थियो ।
खेलको सुरुवातबाटै आक्रमक देखिएको एपीएफले १० मिनेट भित्र दुई अवसर सिर्जना गरेको थियो । उसका आशिष लामाले खेलको ७ औं मिनेटमा डिबक्स बाहिरबाट गरेको प्रहार शेर्पाका गोलरक्षक किशोर गिरिले पन्च गरे । लगतै ८ औं मिनेटमा एपीएफका राम कुमार कुमारले दायाँ भागबाट गरेको क्रस शेर्पाका गोलरक्षक गिरिको पन्जाबाट पुत्केपछी क्रसबारमा लागेर फर्कियो । सो बललाई शेर्पाका कप्तान मान बहादुर तामाङले बाहिर फ्याले ।
खेलको २३ औं मिनेटमा एपीएफले अर्को सुन्दर मौका बनायो तर उसका प्रबिन कुमार स्याङतान गोल गर्न चुके । मैदानको बायाँ भागमा किपर बिट भएपनि उनले पोस्ट प्रहार गर्न सकेनन । खेलको ४४ औं मिनेटमा एपीएफका सुदिप शिख्राकारले २५ यार्डबाट हानेको फ्रिकिक क्रसबारको केही इन्च माथिबाट बाहिरियो ।
पहिलो हाफमा शेर्पाले एपीएफले जस्तो उत्कृष्ट प्रदर्शन गर्न सकेन । खेलको २३ औं मिनेटमा काउन्टरमा एउटा अवसर बनाएको थियो । तर, उसका बिदेशी खेलाडी स्टेफन सामिर डिबक्स नजिकै लड्दा बल प्रहार गर्न सकेनन ।
खेलको ४० औं मिनेटमा शेर्पाले अर्को मौका बनायो । भिषण गुरुङको कर्नरमा आएको रिबाउण्ड बललाई आशिस गुरुङले क्रसबार माथिबाट प्रहार गरे ।
खेलको अतिरिक्त समयमा शेर्पाका परिवर्तित खेलाडी खामिर गिल्सन काङ्दवाले गरेको प्रहार एपीएफका गोलरक्षक अमृत कुमार चौधरीले सहजै बचाए ।
दोस्रो हाफमा दुबै टोलीले एक एक गोल गर्नु बाहेक उत्कृष्ट अवसर सिर्जना गर्न सकेन ।
के भन्छन् प्रशिक्षक ?
एपीएफका मुख्य प्रशिक्षक राजेन्द्र तामाङले ३ अंक जोड्ने लक्ष्य भएपनि बराबरीमा सन्तुष्ट रहेको बताए ।
'समग्रमा खेल राम्रो भयो । एक अंक भएपनी आएको छ,' तामाङले भने, 'तीन अंकको लक्ष्य थियो । बल पोजिसन राम्रो भएपनी गोल गर्न सकेनौ । पहिलो गोल आफ्नै गल्तीले खायौं ।'
शेर्पाका प्रशिक्षक सन्जिब बुढाथोकीले एपीएफविरुद्ध टिमको खेल सुधार भएको बताए । तर, खेलाडीको सानो गल्तीले अंक गुमाउनु परेको बताए ।
'तीन अंक ल्याउने लक्ष्य थियो । गल्तीले अंक गुमायौं,' उनले भने, 'पहिलो खेल भन्दा राम्रो भयो । तर, पहिलो पटक विदेशी खेलाडी खेलाएपनी उनीहरुले राम्रो प्रदर्शन गर्न सकेनन् ।'
एपीएफ प्लेईङ सेट -
राम कुमार कुमाल, अमृत कुमार चौधरी, प्रविन कुमार स्याङतेन, सुदिप शिख्राकार, नविन लामा, रमेश दंगाल, टोप बहादुर बिष्ट (कप्तान) , आशिष लामा, राजन गुरुङ, बुद्धिमान राई, राजिब लोप्चन
शेर्पा प्लेईङ सेट -
किशोर गिरी, मान बहादुर तामाङ,स्टेफन समिर, त्रिदेभ गुरुङ, विश्वास श्रेष्ठ, निरज बस्नेत, रबि थापा मगर,आशिष गुरुङ, भिषण गुरुङ, उल्रीच शिवी, विनोद गुरुङ
