काठमाडौं । सहिद स्मारक ए डिभिजन लिगमा अहिले हिमालयन शेर्पा र विभागीय टिम शसस्त्र प्रहरी बल एपीएफबीच प्रतिस्पर्धा भईरहेको छ ।
त्रिपुरेश्वरस्थित दशरथ रंगशालामा जारी खेलको पहिलो हाफ सकिदा एपीएफ र हिमालयनले गोलरहित बराबरी खेलेका छन् ।
पहिलो हाफमा दुबैले पाएको अवसर खेर फाल्दा बराबरी खेलेको हो ।
खेलको सुरुवातबाटै आक्रमक देखिएको एपीएफले १० मिनेट भित्र दुई अवसर बनायो । उसका आशिष लामाले खेलको ७ औं मिनेटमा डिबक्स बाहिरबाट गरेको प्रहार शेर्पाका गोलरक्षक किशोर गिरिले पन्च गरे । लगतै ८ औं मिनेटमा एपीएफका राम कुमार कुमारले दायाँ भागबाट गरेको क्रस शेर्पाका गोलरक्षक गिरिको पन्जाबाट पुत्केपछी क्रसबारमा लागेर फर्कियो । सो बललाई शेर्पाका कप्तान मान बहादुर तामाङले बाहिर फ्याले ।
खेलको २३ औं मिनेटमा एपीएफले अर्को सुन्दर मौका बनायो तर उसका प्रबिन कुमार स्याङतान गोल गर्न चुके । मैदानको बायाँ भागमा किपर बिट भएपनि उनले पोस्ट प्रहार गर्न सकेनन । खेलको ४४ औं मिनेटमा एपीएफका सुदिप शिख्राकारले २५ यार्डबाट हानेको फ्रिकिक क्रसबारको केही इन्च माथिबाट बाहिरियो ।
पहिलो हाफमा शेर्पाले एपीएफले जस्तो उत्कृष्ट प्रदर्शन गर्न सकेन । खेलको २३ औं मिनेटमा काउन्टरमा एउटा अवसर बनाएको थियो । तर, उसका बिदेशी खेलाडी स्टेफन सामिर डिबक्स नजिकै लड्दा बल प्रहार गर्न सकेनन ।
खेलको ४० औं मिनेटमा शेर्पाले अर्को मौका बनायो । विशन गुरुङको कर्नरमा आएको रिबाउण्ड बललाई आशिस गुरुङले क्रसबार माथिबाट प्रहार गरे ।
