काठमाडौं । संकटा क्लबले सहिद स्मारक 'ए' डिभिजन लिग फुटबलमा पहिलो जित निकालेको छ ।
शनिबार भएको खेलमा न्युरोड टिम एनआरटीलाई १-० गोल अन्तरले पराजित गर्दै संकटाले पहिलो जित निकालेको हो ।
त्रिपुरेश्वरस्थित दशरथ रंगशालामा संकटालाई जित दिलाउन दिपेश आले मगरले निर्णायक गोल गरे । खेलको नवौं मिनेटमा दिपेशले गोल गरेका थिए । उनले कप्तान अमित तामाङको क्रसलाई सदुपयोग गरेका थिए ।
फरवार्ड कर्ण लिम्बुलाई अनुबन्ध गर्दै मैदान उतारेको संकटाले पहिलो हाफमा उत्कृष्ट खेल पस्किएको थियो । एक गोलसहित केहि उत्कृष्ट अवसर समेत सिर्जना गरेको थियो ।
यस्तै एनआरटीले पनि पाएको अवसरमा गोल गर्न सकेन् । खेलको २५ औं मिनेटमा एनआरटीले दुई अवसर खेर फालेको थियो । राजेश परियार र दर्शक गुरुङ डिबक्स भित्रबाटअनमार्क रहदा समेत गोल गर्न सकेनन् ।
दोस्रो हाफमा एनआरटीले संकटाविरुद्धको आक्रमणलाई तिब्र बनायो । तर, गोल गर्न भने सकेन । ६८ औं मिनेटमा दर्शन गुरुङले डिबक्स बाहिरबाट गरेको कडा प्रहार संकटाका किपर विनय श्रेष्ठले मुश्किलले बचाए । त्यसअघि दर्शन वान भर्सेस वानमा गोल गर्न चुकेका थिए ।
लगत्तै पाएको कर्नरमा एनआरटीका आन्द्रे थेरीको हेड पनि विनयले बचाए । यस्तै ८० औं मिनेटमा जोर्डन एनडिम्बा ओवानाको गोल अफसाइड हुँदा एनआरटी बराबरी फर्काउन असफल भएको थियो ।
संकटाले पनि दोस्रो हाफमा केहि उत्कृष्ट सिर्जना गरेको थियो । खेलको ४७ औं मिनेटमा मेसुके ओलुमौको प्रहार एनआरटीका कप्तान प्रकाश बुढाथोकीले गोललाइनबाट क्लियर गरेका थिए । उक्त रिबाउन्ड बललाई राजेन्द्र रावलले पुनः प्रहार गर्दा पुनः एरिक बिष्टले गोललाइनबाट बल क्लियर गरेका थिए ।
यस जितसँगै संकटाले लगातार दोस्रो सिजन एनआरटीलाई हराउन सफल भएको छ । गत सिजन संकटाले एनआरटीलाई १–० गोल अन्तरले हराएको थियो ।
जितसँगै संकटाले २ खेलमा ३ अंक जोडेको छ । संकटा पहिलो खेलमा च्यासलसँग २-० ले पराजित भएको थियो ।
एनआरटीको यो पहिलो हार हो । पहिलो खेलमा एनआरटीले सरस्वती युथ क्लबलाई ४-० गोल अन्तरले पराजित गरेको थियो ।
के भने प्रशिक्षकले ?
एनआरटीका प्रशिक्षक राजुकाजी शाक्यले भाग्यले दोस्रो खेल हार्न पुगेको बताए ।
‘खेलाडीको प्रर्दशनबाट सन्तुष्ट छु । दोस्रो हाफमा दबाबमा समेत राख्यौ तर गोल हुन सकेन ।’ उनले भने, ‘विपक्षी गोलकिपरले राम्रो बचाउ गरे ।’
उनले लिगका हरेक खेलको प्रर्दशनमा एकरुपता नहुने भन्दै आगामी खेलमा अझ सुधार गर्ने उल्लेख गरे ।
संकटाका प्रशिक्षक विजय महर्जनले चाहिएको अवस्थामा नतिजा निस्किएको बताए । उनले जितको श्रेय खेलाडीलाई दिदै लक्ष्य पुरा गर्न अझ मेहनत गर्नुपर्ने बताए ।
‘पहिलो हाफमा अग्रता लिदाँ दोस्रो हाफमा दबाब झेल्यौ । तर समग्रमा प्रर्दशन राम्रो रह्यौ ।’ उनले भने, ‘नतिजा चाहिएको थियो । नतिजाको श्रेय खेलाडीलाई दिन्छु ।’
संकटा प्लेईङ सेट -
अमित तामाङ,अर्नेस्ट टाम्पी,रोमन लिम्बु,दिपेश आले मगर,मेसुके ओलुमौ,सुबाश गुरुङ,विनय श्रेष्ठ,राजेन्द्र रावल,बिष्णु सुनार, कर्ण लिम्बु, अजायी मार्टीन
एनआरटी प्लेईङ सेट -
एरिक बिष्ट,बिक्रम धिमाल,प्रकाश बुढाथोकी,अजित प्रजापति,राजेश परियार,सरोज तामाङ, दर्शन गुरुङ,नबिन गुरुङ,आन्द्रे थेरी बियिक,जुनियर निकेनगुए, जोर्डन एनडिम्बा ओवाना
