एजेन्सी । सहिद स्मारक ए डिभिजन लिगमा ब्रिगेड ब्वाईजले फ्रेन्ड्स क्लबमाथि रोमाञ्चक जित दर्ता गरेको छ ।
शुक्रबार भएको लिगको दोस्रो खेलमा ब्रिगेडले फ्रेन्ड्सलाई २–० ले हराएको हो ।
ब्रिगेडको जितमा दुवै गोल उमेर समुहबाट खेल्ने जया गुरुङ र रोशन राना मगरले गरे ।
खेल सकिन दुई मिनेट अगाडीले जयाले गोल गर्दै ब्रिगेडलाई अग्रता दिलाएका थिए ।
ईन्जुरी समयमा रोशनले गोल गर्दै ब्रिगेडलाई २–० को जित दिलाए ।
दुई खेलको समाप्तिमा ब्रिगेडले लिगमा ३ अंक जोडेको छ । फ्रेन्ड्स अंक विहिन छ ।
चलेनन् ब्राजिलियन
फ्रेन्ड्सले नयाँ सिजन तीन ब्राजिलीयन खेलाडी अनुबन्धन गरेको थियो । तर तीनै जना खेलाडीले लिगमा प्रभाव जमाउन सकेनन् ।
भिषा प्रक्रियाका कारण पहिलो खेल खेल्न नपाएका विदेशी खेलाडीलाई दोस्रो खेलमा दुवै टिमले उतारेका थिए । तर खेलमा प्रभाव उमेर समूहका राष्ट्रिय टिमबाट खेल्ने खेलाडीले देखाए ।
खेलको १५ औ मिनेटमा फ्रेन्ड्सले गोलको अवसर पाएको थियो । ब्राजिलीयन खेलाडी फिलिप डे सौजाको प्रहार ब्रिगेडका गोलरक्षक विशाल सुनुवारले सहजै बचाए ।
१७ औं मिनेटमा ब्रिगेडका विजय गुरुङको फ्रिकिकलाई फ्रेन्ड्सका गोलरक्षक देब लिम्बुले उत्कृष्ट ढङ्गले बचाउ गरेका थिए ।
३१ औ मिनेटमा फ्रेन्ड्का प्रिजन तामाङ वान भर्सेस वानमा गोल गर्न चुकेका थिए ।
दोस्रो हाफमा ब्रिगेडले सुधारिएको प्रर्दशन गर्यो । ब्रिगेडका जयले ८८ औ मिनेटमा ब्रिगेडलाई अगाडी बढाएका थिए ।
ईन्जुरी समयमा रोशनले व्यक्तिगत दोस्रो गोल गर्दै टिमको जित सुनिश्चित गरेका थिए । दुवै खेलाडी राष्ट्रिय यू–१९ टिमका महत्वपुर्ण सदस्य हुन् ।
के भने प्रशिक्षकले ?
ब्रिगेडका प्रशिक्षक अर्बिन गुरुङ टिमको प्रर्दशनबाट खुसी देखिए ।
'तीन अंक लिन आएका थियौ, पायौं पनि । नतिजाबाट खुसी छौँ । अर्को खेलमा पुरै विदेशी खेलाउन पाउँदा थप सहज हुन्छ भन्ने लागेको छ,' उनले भने ।
उनले टिम विस्तारै सेट हुँदै गएको उल्लेख गर्दै आगामी दिन खेल परिस्कृत बन्ने धारणा राखे ।
खेलका म्यान अफ दी म्याच जया गुरुङले खेल प्रतिस्पर्धात्मक भएपनि मेहनत अनुसार जित हासिल गर्न सकिएको बताए ।
यस्तै फ्रेन्ड्सका विदेशी प्रशिक्षक मार्कुस फिलिप टिमको प्रर्दशनबाट बेखुस थिए ।
'निकै खराब प्रर्दशन रह्यो । क्लबको प्रर्दशनमा खुसी छैन,' उनले भने ।
पहिलो हाफ राम्रो भएपनि दोस्रो हाफमा खेल्न नसकिएको उनको गुनासो थियो ।
'ब्राजिलीयन खेलाडीले समेत खेल्न सकेनन् । सोही कारण क्लबको प्रर्दशनबाट दुखी छु ।' उनले थपे ।
बिग्रेड ब्वाईजकाे प्लेइङ सेट - अनिल गुरुङ, जय गुरुङ, मनोज राई, पदम भट्टराई, रितिक कुमार खड्का (६३' मिनेटमा पृथ्वी चौधरी) रोशन राना मगर (९२' मिनेटमा सुबित कार्की) रनदिप पौडेल, शिशिर लेखी, विजय गुरुङ (८६' मिनेटमा दिपेन्क राज सिंह) विशाल सुनार, ताजुदिन बुसारी
फ्रेड्न्स क्लबकाे प्लेइङ सेट - शक्ति राई (६८' मिनेटमा अनिल महर्जन) फिलिपे डी सुजा (९५' मिनेटमा राज कन्डाङ्वा) साउलो डी अवानो, वाग्लर डी कार्माे, संजोग महर्जन (६१' मिनेटमा रमेश बर्ताैला) सुरज गुरुङ, विश्व अधिकारी, देव लिम्बु, प्रिजन तामाङ, सरोज योञ्जन, सनिश श्रेष्ठ
