पीपीएल – ज्ञानेन्द्रको काठमाडौं दबाबमा

पोखरा । दोस्रो संस्करणको पोखरा प्रिमियर लिग (पीपीएल) अन्तर्गत आज (बुधबार) दुई खेल हुँदैछ ।

पहिलो खेलमा काठमाडौँ गोल्डेन वारियर्सले धनगढी ब्लुज तथा दोस्रो खेलमा विराटनगर टाईटन्सले पोखरा पल्टनको सामना गर्ने छ ।

पहिलो खेल पोखरा क्रिकेट रंगशालामा बिहान ९ बजे सुरु हुनेछ ।

प्रतियोगितामा काठमाडौँ पहिलो जितको खोजीमा रहेको छ भने धनगढी लगातार दोस्रो जित निकाल्न चाहान्छ ।

सोमबार भएको पहिलो खेलमा विराटनगरलाई ५ रनले पराजित गर्दै धनगढी ब्लुजले प्रतियोगितामा सुखद सुरुवात गरेको थियो ।

काठमाडौँ भने पहिलो खेलमा पोखरा पल्टन र दोस्रो खेलमा बुटवल ब्लास्टर्ससंग पराजित भएको थियो । सोही कारण ज्ञानेन्द्र मल्ल कप्तानीको काठमाडौंलाई खेलमा फर्कन जित आवश्यक छ ।

एक जित निकालेको धनगढी २ अंक सहित अंक तालिकाको दोस्रो स्थानमा रहेको छ । दुवै खेलमा पराजित काठमाडौँ भने अंक विहिन हुँदै तालिकाको पुछारमा रहेको छ ।

यस्तै, दिउँसो पौने १ बजे हुने खेलमा विराटनगरले पोखराको सामना गर्नेछ । प्रतियोगितामा पोखरा दोस्रो जितको खोजीमा रहेको छ भने विराटनगर पहिलो जित निकाल्न चाहान्छ ।

विराटनगर सोमबार भएको खेलमा धनगढीसंग ५ रनले पराजित भएको थियो । यस्तै, पोखराले पहिलो खेलमा काठमाडौँलाई पराजित गरेको थियो भने दोस्रो खेलमा चितवनसंग पराजित भएको थियो ।

पोखरा गत संस्करणको विजेता समेत हो ।

पोखरा २ अंक सहित अंक तालिकाको तेस्रो स्थानमा रहेको छ । यस्तै, पहिलो खेलमा हार ब्यहोरेको विराटनगर तालिकाको पुछारबाट दोस्रो स्थानमा छ ।