पोखरा । पोखरा प्रिमियर लिग (पीपीएल) को साविक विजेता पोखरा पल्टनले गत संस्करणको फाइनल खेल्ने टोली चितवन राइनोजसंग मंगलबार पराजय ब्यहोर्यो ।
दोस्रो दिन चितवनले घरेलु टोली पोखरालाई ६ विकेटले पराजित गरेको हो ।
चितवनको जितमा बाबर हायातले अर्धशतकीय इनिङ्स खेले । ४२ बलमा ६ चौका र ४ छक्का प्रहार गरेका उनले अविजित ६६ रन बनाए । त्यही रन चितवनको जितको आधार बन्यो ।
गत बर्ष चितवनमाथि पुरा हाबी देखिएको पोखरा यस संस्करणमा पराजित भयो । पोखराले गत बर्ष लिग चरण र फाइनल खेलमा चितवनलाई हराएको थियो ।
टस जितेर चितवनले फिल्डिङ रोजेपछि ब्याटिङमा आएको पोखराले २० ओभरमा १० विकेट गुमाएर १ सय ७ रन बनाएको थियो ।
पोखराका लागि कप्तान शरद भेषवाकरले सर्वाधिक ४५ रन बनाए ।
३९ बल खेलेका उनले ३ चौका र ३ छक्का प्रहार गरेका उनी अर्धशतक बनाउन मात्र ५ रनले चुके ।
उपाधि लक्ष्यमा रहेका दुवै टोलीका कप्तानले खेलपछि पिचमा ब्याटिङ गर्न सहज नभएको प्रतिक्रिया दिए ।
दक्षिण एसियाली खेलकुद प्रतियोगिता (साग)को महिला क्रिकेट आयोजना भएको कारण मैदानको तयारी राम्रो भएको थिएन । पीपीएलको अघिल्लो दिन ठुलो वर्षा भएका कारण उद्घाटन खेल समेत एकदिन पछाडी सरेको थियो ।
'गत वर्षको तुलनामा पिचको अवस्था केही खस्किएको छ । साग गेम्सको कारण तयारी कम भए जस्तो लाग्छ ।’ चितवनका कप्तान पारस खड्कले भने, 'केही समय भएको भए तयारी पुग्थ्यो । केही राम्रो हुने सम्भावना थियो ।’
प्रतियोगिता चलिरहँदा मौषम सफा र मज्जाले घाम लागेको कारण आउने दिनमा पिचलले ब्याटिङमा समेत राम्रो सहयोग पुर्याउने पारसको विश्वास छ ।
’हिजो र आज मज्जाले घाम लागेको छ। अस्तिको पानीले केही हदसम्म असर गरेको हुनसक्छ ।’ उनले थपे, 'प्रतियोगिता अगाडी बढ्दै जाँदा गत वर्षकै अवस्थामा पुग्नेमा आशावादी छु ।’
मैदानमा ब्याट्सम्यानलाई भन्दा बलरलाई सहज हुने भएको कारण टस जित्ने टिमले फिल्डिङ रोज्ने गरेका छन् ।
लिगका ४ खेल सकिएको अवस्थामा टस जित्ने टिम सबैले सुरुमा बलिङ रोजेका छन् ।
'बिहानै हुने खेलमा टस जित्ने टोलीलाई केही फाइदा हुने देखिन्छ ।’ पारस भन्छन्, 'तर राम्रो क्रिकेट खेल्नु पर्यो र राम्रो प्रदर्शन गरेर जित्न सकिन्छ जस्तो लाग्छ ।’
पोखराका कप्तान शरद समेत पिचको अवस्थाले ठुलो रन बन्न नसकेको बताउँछन् ।
'कम्तिमा १ सय ४० रन बनाउने योजना थियो । मैदान तथा पिचले साथ दिइरहेको थिएन ।’ शरदले भने, 'त्यसकारण ठूला सट हान्न सहज भएन । बिचमा साझेदारी भएन, विकेट गइरह्यो । त्यसकारण पनि एकदमै थोरै रनमा सिमित हुनुपर्यो ।’
'दिउँसो १ बजेसम्म यो विकेटमा खेल्न गाह्रो छ, सायद अस्तिको पानीले खराब भएको हो ।’ ठुलो स्कोरको बारेमा शरद भन्छन्, 'पिच अझैपनि राम्रोसँग सुकिसकेको छैन ।’
प्रतियोगितामा पोखराले बनाएको स्कोर यस संस्करणको सबै भन्दा कम हो । यस्तै हिजो (सोमबार) बुटवल ब्लास्टर्स र काठमाडौँ गोल्डेन वारियर्सले बनाएको १ सय ४० रन भने सर्वाधिक स्कोर हो ।
-1747226778.jpeg)
