काठमाडौं । नेपाली राष्ट्रिय महिला भलिबल टिमका नियमित सदस्य तथा स्पाइकर प्रतिभा मालीले माल्दिभ्सको महिला भलिबल लिग खेल्ने भएकी छिन् ।
प्रतिभाले माल्दिभ्सको महिला भलिबल लिग पुलिस क्लबबाट खेल्ने छिन् । जसका लागि प्रतिभा बिहिबार त्यसतर्फ जाने छिन् ।
प्रतिभाले छोटो समयको लिग हुने भएको कारण माल्दिभ्स जान लागेको बताईन् ।
'यस अघि २० दिन हुने भएकोले पढाईमा असर हुन्छ भनेर नजाने निर्णय गरेको थिए । तर, त्यहाका साथीहरुको आग्रह र लिग १० दिन हुने भएकोले जान लागेको हो,' प्रतिभाले खेलपाटीसँग भनिन् ।
लिगका लागि दुई क्लबबाट प्रस्ताव आएको भएपनि पुलिस क्लब छनोट गरेको प्रतिभाले बताईन् ।
'मलाई दुई क्लबले प्रस्ताव गरेको थियो । तर, यस पटक पुलिसबाट खेल्ने छु,' प्रतिभाले थपिन् ।
प्रतिभाले यस अघि पनि माल्दिभ्सको क्लबबाट खेलिसकेकी छिन् ।
घरेलु भूमिमा नेपाललाई १३ औं सागको उपविजेता बनाउन सफल प्रतिभाले अनुबन्ध रकमबारे भने गोप्य रहने बताईन् ।
