काठमाडौं । ब्यवसायीक फुटबल एकेडेमी बनाउने लक्ष्य सहित ए डिभिजन क्लब संकटाले तयार पारेको फुटबल मैदानको शनिबार औपचारिक उद्घाटन गरिएको छ ।
राष्ट्रिय खेलकुद परिषद् राखेपका सदस्य सचिव रमेश सिलवाल र अखिल नेपाल फुटबल संघ एन्फाका अध्यक्ष कर्माछिरिङ शेर्पाले भक्तपुरमा रहेको क्लबको नव निर्मित फुटबल मैदानको औपचारिक उद्घाटन गरेका हुन् ।
उद्घाटन समारोहमा एन्फाका वरिष्ठ उपाध्यक्ष पंकज बिक्रम नेम्वाङ समेत सहभागी थिए ।
संकटाले भक्तपुरको फलासेमा ३१ रोपनी जग्गा भाडामा लिएर फुटबल मैदान तयार पारेको हो । जग्गा दुई बर्ष अघि १५ बर्षका लागि लिजमा लगिएको हो । संकटाले सोही फुटबल मैदानमा करिब ८ हजार दर्शक अट्ने प्यारापिट बनाउने योजना समेत अघि सारेको छ ।
क्लबका अध्यक्ष ईन्द्रमान तुलाधरले ब्यावसायीक एकेडेमी बनाउने लक्ष्य सहित क्लबको आफ्नै फुटबल मैदान तयार गरेको बताए । उनले निकट भविष्यमा होम एण्ड अवेका आधारमा सञ्चलन गर्न लागिएको फुटबल लिगलाई ध्यानमा राखेर संकटाले आफ्नै मैदान तयार गरेको जानकारी गराए ।
सन् २००८ मा स्थापना भएको संकटा क्लबले कमल थापा, गणेश थापा लगायतका घरेलु फुटबलमा सफल फुटबलर जन्माएको ईतिहास छ ।
ए डिभिजनको तेस्रो पुरानो क्लब संकटाले फुटबल मैदान सहित सो क्षेत्रमा रिसोर्ट बनाउने योजना छ ।
कार्यंक्रमको उद्घाटन सत्रमा क्लबका अध्यक्ष तुलाधरले सागको पुर्व सन्ध्यामा विदेशी टिमका लागि अभ्यास गर्न मैदानको उद्घाटन गरिएको बताए ।
उनले फुटबल मैदान रहेको क्षेत्रमा अर्गानिक तरकारी रोप्न, विदेशी टिमको तयारी गर्न र रिसोर्ट सहितको फुटबल मैदान सञ्चालन गर्ने योजना रहेको सुनाए ।
उनले सुरुवातमा लिग खेल्दा धेरै समस्या भएपनि अहिले क्लब सहज अवस्थामा रहेको जानकारी गराए ।
उनले काठमाडौंको न्युरोड नजिकै टेबहालमा क्लबको आफ्नै भवन बनाउँदै गरेको जानकारी दिदै संकटाले ग्रासरुट फुटबलको कार्यक्रम सञ्चालन गर्ने, स्थानीय खेलाडीलाई प्रशिक्षण दिने र उत्पादन भएका खेलाडीलाई क्लबबाट खेलाउने लक्ष्य राखेको बताए ।
कार्यक्रममा एन्फा अध्यक्ष कर्माछिरिङ शेर्पाले संकटा क्लबले नेपाली फुटबलमा कोसेढुङ्गा पार गरेको बताए । उनले क्लबलाई ब्यवसायीक बनाउने अभियान संकटाले सुरुवात गरेकोमा शुभकामना दिए । उनले लिगलाई स्थायित्व दिने योजना रहेको बताउँदै सरकारले त्यसमा सहयोग गर्नुपर्ने धारणा राखे ।
मुख्य अतिथी रमेश सिलवालले क्लबलाई पछिल्लो अवस्थासम्म पुर्याउन योगदान दिने सम्पुर्ण संकटा परिवारप्रति आभार ब्यक्त गरे । उनले संकटाले अन्य क्लबलाई राम्रो पाठ पढाएको उल्लेख गर्दै लिजमा रहेको जग्गा केही बर्षमा आफ्नै नामको बनाउन शुभकामना दिए ।
याे पनि,
अब संकटाको आफ्नै फुटबल मैदान
