काठमाडौं । फिफा विश्वकप छनोट अन्तर्गत नेपालले आज (मंगलबार) कुवेतसंग प्रतिस्पर्धा गर्दैछ ।
काठमाडौंको दशरथ रंगशाला तयार नभएपछि तटस्थ मैदानको रुपमा भुटानको चाम्लिमिथाङ रंगशालामा नेपालले खेल्न लागेको हो ।
खेल दिउसो पौने ३ बजे सुरु हुनेछ ।
पहिलो अवे खेलमा नेपाल कुवेतसंग ७–० ले हारेको थियो ।
कुवेतविरुद्ध खेल्न भुटान उड्नु अघि नेपाली टिमका मुख्य चार सदस्य निलम्बनमा परे । भ्रमणको अघिल्लो दिन खेलाडी रातको समयमा नाईट क्लबमा भेटिएपछि चार खेलाडीलाई टिम बाहिर राख्दै फुटबल टिम भुटान उडेको हो ।
मुख्य चार खेलाडी नभएको अवस्थामा प्रशिक्षक योहान कालिनलाई अनुकुलको प्लेईङ सेट उतार्न गाह्रो पर्न सक्नेछ । बलियो टिमविरुद्व डिफेन्समा जोड दिने कालिन रणनीति मंगलबार कत्तिको सफल होला ? त्यो हेर्न बाँकी छ ।
कारबाहीमा परेका चार र चोटका कारण एक खेलाडी कालिनले कुवेतविरुद्व उतार्ने छैनन् । विमल घर्तिगमर, अन्जन विष्ट, सन्तोष तामाङ र दिनेश राजवंशी कारबाहीमा छन् भने विशाल राई चोटका कारण आराम गरिरहेका छन् ।
कालिनले फरवार्ड विमल घर्तिमगरलाई विश्वकप छनोटको पछिल्लो ४ खेल मध्य जोर्डन, कवेत र चाइनिज ताईपेविरुद्ध प्लेईङ सेटमा खेलाएका थिए । अष्ट्रेलियाविरुद्धको खेलमा भने ६६ मिनेटमा उनी अभिषेक रिजालको स्थानमा मैदान छिरेका थिए । जोर्डन र ताईपेविरुद्ध पुरा समय मैदान बिताएका विमल कुवेतविरुद्ध ८२ औ मिनेटमा मैदान छाडेका थिए ।
यस्तै, कुवेतविरुद्धको खेलमा ८२ औ मिनेटमा मैदान छिरेका अन्जन विष्ट ताईपे, अष्ट्रेलिया र जोर्डनविरुद्ध प्लेईङ सेटमै रहेर खेलेका थिए । ताईपेविरुद्धको जितमा दुवै गोल उनले गरेका थिए ।
उता कुवेतविरुद्धको खेलमा अजित भण्डारी घाईते भएपछि दिनेश राजवंशीले ५५ औं मिनेटमा मैदान प्रवेश गरेर छनोट खेलेको सुरुवात गरेका थिए । त्यसयता उनी ताईपे, अष्ट्रेलिया र जोर्डनविरुद्ध पुरा समय खेलका छन् ।
नियमित खेलाडी बिशाल राई घाईतेपछि सन्तोष तामाङले जोर्डनविरुद्व प्लेईङ सेटमा रहेर खेल्ने मौका पाएका थिए । अष्ट्रेलिया र ताईपेविरुद्ध ७९ औ मिनेटमा मैदान पसेका सन्तोष कुवेतविरुद्धको खेलमा भने मैदान बाहिरनै रहे ।
त्यस्तै, कुवेत र ताईपेविरुद्ध पुरा समय खेलका विशाल राई अष्ट्रेलियाविरुद्ध घाईते हुँदै ८७ औ मिनेटमा मैदान छाडेका थिए । त्यसयता उनी मैदान बाहिर रहदै आएका छन् ।
तेज र विक्रमको सम्भावना
प्रशिक्षक कालिननले नियमित ५ खेलाडी बाहिर रहेपछि मिडफिल्डमा तेज तामाङ र बिक्रम लामालाई प्रयोग गर्न सक्छन् । अन्य पोजिसनमा भने पुरानै सेटका खेलाडीले मौका पाउन सक्नेछन् ।
बिक्रम र तेज फिटनेशमा अब्बल रहेपनि विश्वकप छनोटका सुरुवाती ४ खेल खेल्न पाएका छैनन् । त्यसैले मिडफिल्डमा यि दुई खेलाडी अटाउन सक्नेछन् ।
पछिल्लो पटक म्यानमारविरुद्धको मैत्रीपुर्ण खेलमा कालिनले तेज तामाङलाई प्लेइङ सेटमै मौका दिएका थिए । कालिनले यसअघि अष्ट्रेलियाविरुद्ध सुनिल बललाई प्रयोग गरेका थिए । सोही कारण कुवेतविरुद्ध समेत उनले मौका पाउने सम्भावना उत्तिकै छ । अन्य पोजिसनका खेलाडी यथावत रहने सम्भावना अधिक छ ।
सम्भावित प्लेईङ सेट :
गोलरक्षक : किरण चेम्जोङ
डिफेन्डर : रन्जित धिमाल, अनन्त तामाङ, देबेन्द्र तामाङ, सुमन अर्याल
मिडफिल्डर : सुजल श्रेष्ठ, रोहित चन्द, तेज तामाङ, विक्रम लामा, रवि पासवान
स्ट्राइकर : अभिषेक रिजाल
