‘माईन्ड गेम’मा कसले मार्ला बाजी ?

काठमाडौं । गत मंगलबार एसियाली फुटबल महासंघ (एएफसी)का प्रतिनिधिले विश्वकप छनोट अन्तर्गत नेपाल र कुवेतबीच हुने तय भएको दशरथ रंगशालाको निरिक्षण गरे ।

एएफसीका प्रतिनिधिले निरिक्षणको क्रममा रंगशालाको मैदानमा खोट देखाएका थिए ।

मैदानमा रोपिएको घाँस अन्तराष्ट्रिय मापदण्ड अनुसार नभएको उनीहरुको दाबी थियो ।

भद्रगोल रंगशला र बिजोग अवस्थामा रहेका ड्रेसिङ रुपबारे उनीहरुले खासै चर्चा गरेनन् ।

तर एएफसीको केन्द्रिय कार्यालय पुगेपछि उनीहरुले दशरथ रंगशालाको बिरुप चित्र प्रस्तुत गरे ।

वास्तवमा दशरथ रंगशाला विश्वकप छनोटको खेल गराउने अवस्थामै थिएन ।

मैदान हरियो बन्दै थियो । साधारणतर्फको प्यारापिटमा सिट जडान हुदै थियो ।

तर भिआईपीतर्फको प्यारापिट उदाङ्गो जस्तै देखिन्थ्यो ।

रंगशालाको छत कहिले आउने टुङ्गो थिएन । छत राख्ने पिलर ठडिएका थिएनन् । बन्नु पर्ने ड्रेसिङ रुममा झुल टाँगेर बेडहरु राखिएको थियो ।

राखेप सदस्य सचिवले हाल्ने दाबी गरिएको पाल समेत रंगशाला आईपुगेको थिएन ।

यि तमाम कारणले दशरथ रंगशालामा विश्वकप छनोटको खेल नहुने निश्चित थियो ।

त्यही रिपोर्ट एएफसीमा पुगेको थियो ।

एएफसीको अनुगमन टोली अगाडीनै कुवेतका प्रतिनिधि समेत नेपाल आएर भद्रगोल रंगशलाको फोटो लिन भ्याएका थिए ।

त्यही फोटो उनीहरुले एएफसी समक्ष पठाएका थिए ।

आफ्ना प्रतिनिधिले तयार पारेको रिपोर्ट अनुसार एएफसीले दशरथ रंगशालामा विश्वकप छनोट अन्तर्गत कुवेतविरुद्वको खेल गर्न नसकिने प्रष्ट पार्दै विकल्प दिन अखिल नेपाल फुटबल संघ (एन्फा)लाई पत्राचार गरेको थियो ।

विश्वकप छनोटको पहिलो लेगको खेल नेपालले कुवेतमा गएर खेलेको थियो ।

दोस्रो लेगमा नेपालले आथित्यता प्रदान गर्नुपर्ने थियो ।

तर अन्तराष्ट्रिय स्तरको दाबी गरिने एकमात्र रंगशालाको पुनर्निमाण समयमै हुन नसक्ने भएपछि एन्फाको केही जोर चल्ने कुरै भएन ।

हुन त कुवेतले दोस्रो लेगको खेल समेत आफ्नै देशमा खेल्न एन्फालाई प्रस्ताव गरेको थियो । उसले हवाई टिकटदेखि बसोबास लगायतका सबै प्रबन्ध आफुले गर्ने लोभ देखाएको थियो ।

तर एन्फाले कुवेतको सो प्रस्तावलाई अस्विकार गर्यो । पहिलो लेगमा ब्यहोरेको ७-० को हारको नतिजालाई घरेलु मैदानमा बदल्ने नेपालको अठोट थियो ।

तर रंगशाला तयार नहुदाँ त्यो अठोट रहरै रह्यो ।

एएफसीको निर्देशनसंगै एन्फाले विकल्पको रुपमा नेपालको मौसमसंग मिल्ने भुटानलाई विश्वकप छनोटको खेलका लागि प्रस्ताव गर्यो ।

खाडीको गर्मीमा अभ्यस्त खेलाडीलाई हिमाली देशमा बोलाएर प्रतिकुल मौसमको फाईदा उठाउने नेपालको दाउ थियो ।

सोही अनुसार दशरथ रंगशालामा खेल नहुने तय हुने बित्तिकै नेपालले आफ्नै मौसम अनुसारको भुटानको थिम्पुस्थित चाम्लिमिथाङ रंगशालालाई विकल्पको रुपमा प्रस्ताव गरेको थियो ।

तर नेपालको दाउ बुझेको कुवेतले उडान र भिषाको समस्या देखायो । उसले भुटानको फ्लड लाईन समेत ठिक नभएको रिपोर्ट एएफसीमा गर्यो । एक हिसाबले कुवेतले नेपालविरुद्वको ‘माइन्ड गेम’ त्यहीबाट सुरु गर्यो ।

अब कुवेतको अन्तराष्ट्रिय रुपमा लबिङ गर्दै एएफसीमार्फत एन्फालाई भुटानको समेत विकल्प दिन प्रस्ताव गरेको छ ।

खाडीमै खेल गराउन खोज्ने कुवेतको मनसाय बुझेको एन्फाले समेत भुटानमार्फत कुवतेलाई भिषा र सहज उडान उपलब्ध भएको सूचि पठाएको छ ।

कुवेत यतिसम्म पुर्वाग्रही देखिएको छ, नेपाल र कुवेतको खेल दिउँसो ३ बजे प्रस्ताव गरिएको छ । तर कुवतेले भुटानको फ्लड लाईटमा ‘अब्जेक्सन’ जनाएको छ ।

संयोग कस्तो भने, सोही रंगशालामा कुवेतले ग्वामसंग विश्वकप छनोटको खेल खेलिसकेको छ ।

त्यसो भए भुटानको मैदान फिफाको कुनैपनि प्रतियोगिता खेलाउन लायक छैन त ?

एन्फाले यसो भन्दै भुटानलाई अन्तराष्ट्रिय लबिङका लागि दबाब दिईरहेको छ ।

कुवेतको प्रस्तावबाट झस्किएको भुटान समेत आफ्नै मैदानमा विश्वकप छनोटको खेल कुनैपनि हालतमा गराउन लागिपरेको छ ।

विश्वकप छनोटको खेल अब भुटानको प्रतिष्ठासंग समेत जोडिन आईपुगेको छ, नेपाल यसै भन्दै उसलाई उचालिरहेको छ ।

कुवेतको दाउ

एसियाली फुटबलको शक्ति राष्ट्र कुवेतको अवस्था विश्वकप छनोटमा ठिक छैन । एसिया छनोटको समूह बीमा रहेको कुवेत तेस्रो स्थानमा छ ।

विश्वकप छनोटको दोस्रो चरण पार गर्न अष्ट्रेलिया, जोर्डन र कुवेतबीच चर्को प्रतिस्पर्धा छ । अन्तिम समयमा अंकमात्र हैन, गोल अन्तरले समेत निर्णायक भुमिका खेल्न सक्छ ।

सोही कारण कुवेत नेपालविरुद्वको दोस्रो लेग समेत सकेसम्म घरेलु मैदानमै गराउन चाहन्छ । नभए खाडीको आफु अनुकुल कुनै देशमा राख्न चाहन्छ ।

सोही अनुसार कुवेतले अन्तराष्ट्रिय लबिङ तिव्र बनाएको छ । सोही बिषयलाई लिएर कुवेत फुटबल महासंघका अध्यक्ष शेख अहमेद अल युसुफ अल सबाहले एएफसी अध्यक्ष शेख सलमानसंग भेट गरेर छन् ।

कुवेतले भुटानमा खेल हुन नसक्ने आधार प्रस्तुत गर्दै नेपाललाई भुटानबाट समेत बाहिर ल्याउन खोजेको छ । उसले उडान, फ्लड लाईट, मैदान लगायतको कारण देखाईरहेको छ ।

कुवेतको सोही लबिङका आधारमा एएफसीले भुटानको विकल्प खोज्न पत्राचार गरेको बुझाई एन्फाको छ ।

एन्फाको दाउ

काठमाडौंको अहिलेको तापक्रम १६ डिग्री सेल्सियसको हाराहारीमा छ । मंसिरको पहिलो साता तापक्रम अझ कम हुनेछ । अर्थात १२ को हाराहारीमा आई पुग्नेछ ।

नेपालको सोही मौसमसंग कुवेत डराएको हो । दशरथ रंगशालामा खेल्न नमानेपछि नेपालले काठमाडौं भन्दा अझ कम तापक्रम भएको भुटानलाई रोजेर कुवेतमाथि ‘माईन्ड गेम’को प्रतिकार गरिसकेको छ ।

अब भुटानको समेत विकल्प दिन कुवेतले एएफसीमार्फत एन्फामाथि दबाब दिईरहेको छ ।

अब एन्फाले के गर्ला ? सबैको चासोको बिषय यही छ ।

तर एन्फा नेतृत्व कुनैपनि हालतमा भुटानमा कुवेतविरुद्वको खेल गराउन चाहन्छ ।

नेपाल सकेसम्म भुटान छाड्न चाहदैन । अन्तिम समयसम्म भुटानमै खेल गराउने नेपालको चाहाना छ ।

भुटान आफैसमेत विश्वकप छनोटको खेल खेलाउन ईच्छुक छ । सोही अनुसार भुटानले समेत अन्तराष्ट्रिय लबिङ गरिहेको छ ।

यदी भुटानकै विकल्प रोज्नु परेमा एन्फाले के गर्ला ?

मंगोलिया !

एन्फा नेतृत्वले नऔपचारिक छलफलमा यसै भनिरहेको छ ।

अर्थात काठमाडौंको १६ डिग्री र भुटानको ६ डिग्रीमा तापक्रममा खेल्न नमान्ने कुवेतलाई मंगोलियाको माइनस ‘टू’ डिग्री सेल्सियस तापक्रममा लैजाने एन्फाले अनौपचारिक रुपमा बताईरहेको छ ।

कुवेतविरुद्व दबाब थपिरहेको छ ।

आफ्नो ‘माईन्ड गेम’को निरन्तर प्रतिकार गरिरहेको कुवेत साँच्चिकै मंगोलियाको ऋणात्मक तापक्रममा गएर खेल्न तयार होला ?

कुवेत र नेपालबीच चलिरहेको यो ‘माइन्ड गेम’को विजेताले धेरै कुराको टुङ्गो लगाउँला ।

तर मैदानभित्रको खेल मंसिर ३ गते हुने तय छ ।