१३ औ साग समयमै हुने सुनिश्चित

काठमाडौं । नेपालमा हुने तय भएको १३ औ दक्षिण एसियाली खेलकुद प्रतियोगिता (साग) निर्धारित समयमा हुने सुनिश्चित भएको छ ।

काठमाडौंमा शनिबार बसेको दक्षिण एसियाली ओलम्पिक काउन्सिलको बैठकले नेपालमा आयोजना हुने १३ औ सागलाई भब्यताका साथ सम्पन्न गर्ने निर्णय गरेको हो ।

सरकारले पुर्वाधार निर्माणको काम समयमै सक्ने प्रतिबद्वता जनाएसंगै साग निर्धारित मितिमै हुने पक्का भएको हो ।

सरकारकातर्फबाट राष्ट्रिय खेलकुद परिषद् (राखेप)का सदस्य सचिव रमेश सिलवालले प्रतियोगिता अघिनै पुर्वाधार निर्माणको काम सक्ने प्रतिबद्वता बैठकमा जनाएका थिए ।

सरकारले पुर्वाधार निर्माणको काम समयमै सम्पन्न गर्न नसक्दा निर्धारित मितिमै साग हुनेमा अन्यौलता देखिएको थियो । सोही कारण तयारीमा समेत सुस्तता देखिएको थियो ।

१३ औ संस्करणको साग मंसिर १५ गते २४ गतेसम्म नेपालमा आयोजना हुदैछ ।

बैठकमा नेपालले प्रतियोगिताको व्यवस्थापन र सञ्चालनको जिम्मेवारी सफलतापुर्वक सम्पन्न गर्ने प्रतिबद्वता जनाएसंगै सहभागी सदस्य राष्ट्र समेत साग आयोजनामा विश्वस्त देखिएका थिए ।

प्रतियोगिता आउन झण्डै तीन हप्तामात्र बाँकी रहेको अवस्थामा खेल पुर्वाधार निर्माणको काम सम्पन्न हुन सकेका छैनन । पोखरा रंगशाला निर्माणाधिन अवस्थामा छ भने दशरथ रंगशालाको भिभिआईतर्फको छानो अझै काठमाडौं आउन सकेको छैन ।

‘सरकारको तर्फबाट आयोजनामा शंका लिन पर्दैन भनेर प्रतिबद्वता आएको छ । सदस्य राष्ट्रलाई सहभागी हुने तयारी गर्न सरकारले आग्रह गरेको छ ।’ बैठकपछि नेपाल ओलम्पिक कमिटिका अध्यक्ष जीवनराम श्रेष्ठले भने, ‘सरकारको प्रतिबद्वतापछि सहभागी राष्ट्र आश्वस्त भएका छन् । सबैले तयारीको कुरा गरेका छन् । बैठकले सबै आशंकालाई प्रस्ट बनाउने काम भएको छ ।’

अध्यक्ष श्रेष्ठका अनुसार अब भब्यसंग साग सम्पन्न गर्ने दिशामा सबै लाग्नुपर्ने बताए ।

बैठकमा सदस्य सचिव सिलवालले हप्तादिन भित्रमा पुर्वाधार निर्माणको काम सक्ने प्रतिबद्वता बैठकमा राखेका थिए । उनका अनुसार सरकारको प्रतिबद्वताबाट सदस्य राष्ट्र सहमत भएका छन् ।

‘साग आयोजनामा आश्वस्त बनाएका छौ । बाँकी काम सात दिनभित्र सम्पन्न गर्ने प्रतिबद्वता जनाएका छौ ।’ उनले भने, ‘साग आयोजना हाम्रो प्रतिबद्वता हो । हुन्छ कि हुदैन भन्ने बिषय उहिल्यै अगाडी छुटिसकेको छ ।’

साग आयोजना अगाडी ओलम्पिक काउन्सिलको दुई दिने बैठक काठमाडौंमा बसेको हो ।

बैठकले सागको तयारीको समिक्षा गर्दै प्रतियोगिता सञ्चालनका लागि बनेको पुर्वाधारको निरिक्षण समेत गर्नेछ ।

अर्काे साग पाकिस्तानमा !

बैठकले १४ औं संस्करणको साग पाकिस्तानमा गर्ने प्रस्ताव गरेको छ ।

'साग आयोजनाको पालो अब पाकिस्तानको रहेको छ । हामीले बिधान अनुसार पाकिस्तानलाई पत्र पठाउने छौँ,' बैठकपछि नेपाल ओलम्पिक कमिटिका अध्यक्ष जीवन राम श्रेष्ठले भने, '१३ औं सागअघि उहाहरुको प्रतिक्रिया हेर्छौ । त्यसपछि त्यहाँको अवस्था हेरेर गर्न नसक्ने यो भने आयोजक परिवर्तन गर्न सकिन्छ ।'

पाकिस्तानले आयोजना गर्न नसके १४ औं साग श्रीलंका र माल्दिभ्समा संयुक्त रुपमा आयोजना गर्ने दाबी गरेका छन् । बैठकमा सात राष्ट्रका ओलम्पिक कमिटिका अध्यक्षको सहभागिता रहेको थियो ।