काठमाडौं । अफगानिस्तान पुन: दक्षिण एसियाली खेलकुद (साग) मा फर्कने भएको छ ।
भारतमा सम्पन्न १२ औं सागपछि मध्यपूर्वी क्षेत्रमा जाने घोषणा गरेको अफगानिस्तान पुन: दक्षिण एसियामा फर्कने तयारी गरेको हो ।
दक्षिण एसियाली क्षेत्रको भन्दा आफ्नो खेलकुदको स्तर माथिल्लो रहेको निष्कर्ष सहित अफगानिस्तान मध्यपूर्वी क्षेत्रमा गएको थियो ।
तर, सो क्षेत्रमा खेलकुदका खासै गतिला प्रतियोगिता नभएको कारण देखाउँदै अफगानिस्तानले दक्षिण एसियाली क्षेत्रमा फर्कने निर्णय गरेको हो ।
दक्षिण एसियाली क्षेत्रमा फर्कने तयारी सहित अफगानिस्तानले नेपालमा हुन गईरहेका १३ औं सागमा आफुलाई सहभागी गराउन माग गरेको छ । सोही अनुसार ओलम्पिक काउन्सिल अफ एसियाले समेत आसन्न साग खेलकुदमा अफगानिस्तानलाई समावेश गर्न नेपाललाई आग्रह गरेको छ ।
ओसीएको निर्देशन अनुसार नेपालले समेत डिसेम्बर १ देखि १० सम्म (मंसिर १५ देखि ३० सम्म) काठमाडौंमा आयोजना हुन लागेको तेह्रो संस्करणको सागमा अफगानिस्तानलाई सहभागी गराउने तयारी गरेको छ ।
अन्तिम समयमा सागमा अफगानिस्तानको सहभागीतालाई लिएर दुवै पक्ष आन्तरिक छलफलमा छन् । केही दिनमै सागमा अफगानिस्तान फर्कने बिषयको औपचारिक टुङ्गो लाग्नेछ ।
‘अफगानिस्तान समेत सागमा आउने पक्का जस्तै हो । उनीहरु साउथ एसियाको रिजनमा फर्कने निर्णय गरेका छन् । तर कति खेलमा सहभागी हुने भन्ने बिषयको टुङ्गो लाग्न बाँकी छ ।’ नेपाल ओलम्पिक कमिटि स्रोतले खेलपाटीसंग भन्यो ।
नेपालमा हुन गईरहेको सागमा सात राष्ट्रले सहभागीता जनाउने निश्चित गरेका थिए । अफगानिस्तान समेत सहभागी हुने भएपछि सागमा ८ राष्ट्रले खेल्नेछन् ।
ओसीएको निर्देशन अनुसार नेपालले अफगानिस्तानलाई कुन कुन खेलमा सहभागी गराउने भन्ने बिषयमा छलफल गरिरहेको छ ।
ओलम्पिक स्रोतका अनुसार अफगानिस्तानले मार्सल आर्टका खेलमा आफ्नो सहभागीता खोजेको छ । दक्षिण एसियाली क्षेत्रमा मार्सल आर्टमा राम्रो देखिएको अफगानिस्तानले बक्सिङ, जुडो, कराँते लगायतका खेलमा आफ्नो सहभागीता सुनिश्चित गर्न नेपाललाई आग्रह गरेको छ ।
तर अन्तिम समयमा सहभागीता जनाउने ईच्छा देखाएको अफगानिस्तानलाई नेपालले मार्सल आर्टका खेलमा सहभागी गराउन चाहेको छैन । नेपालले टेबल टेनिस, एथ्लेटिक्स, फेन्सिङ, ट्रायथलन, ब्याडमिन्टन लगायतका खेलमा सहभागी हुन अफगानिस्तानलाई पत्राचार गरेको छ ।
नेपालले पदकको सम्भावना बोकेको मार्सल आर्टमा अफगानिस्तानलाई सहभागी नगराउने सरकारको रणनीति छ ।
नेपालकाे प्रस्तावमा अफगानिस्तानले जवाफ दिन बाँकी छ । तर अन्तिम समयमा केही खेलमा सहभागी हुन र गराउन दुवै पक्ष सहमत छन् ।
सागको पहिलो संस्करण सन् १९८४ मा नेपालबाट सुरु भएको थियो । तर अफगानिस्तान झण्डै २० बर्षपछि साग खेलकुदमा जोडिन आईपुगेको हो ।
सन् २००४ मा पाकिस्तानको ईस्लामावादमा भएको नवौ सागमा अफगानिस्तानले पहिलो पटक सहभागीता जनाएको थियो ।
त्यसपछि अफगानिस्तान लगातार सागमा सहभागीता जनाउँदै आएको थियो ।
तर सन् २०१६ मा भारतको गुवाहाटी र सिलोङमा भएको साग लगत्तै अफगानिस्तानले दक्षिण एसिया क्षेत्र छाड्दै मध्यपुर्वीमा जाने निर्णय गरेको थियो ।
तर मध्यपुर्वमा खेलकुदका खासै गतिला प्रतियोगिता नभएको कारण देखाउँदै अफगानिस्तान पुन साग क्षेत्रमा फर्कने निर्णयमा पुगेको हो ।
-1757154871.jpeg)
