काठमाडौं । साग आउन महिना दिन पनि बाँकी छैन । औलामै गन्दा पनि अब २९ दिन मात्र बाँकी छ । साग आयोजनाका लागि सरकारले १५ वटा बिषयगत समिति बनाएको छ । तर समितिका धेरै काम कागजमा सिमित छन् ।
यही मेलोमा राखेपले शनिबार बिषयगत समितिका संयोजक र सचिवको बैठक राख्यो, तयारी समितिले अहिलेसम्म गरेका कामको प्रगति र गर्न बाँकी कामको समिक्षा गर्न ।
सागलाई सफल बनाउने जिम्मेवारी पाएका समितिका संयोजकले तयारीलाई गम्भिर रुपमा अघि बढाएको देखिनुपर्ने हो । गम्भिर भएर लाग्नुपर्ने हो । तर खेलकुद मन्त्री, खेलकुद सचिव, राखेप सदस्य सचिव, ओलम्पिक कमिटिका अध्यक्ष सहित डाकिएको समिक्षा बैठकमा केही समितिका संयोजकनै अनुपस्थित रहे ।
बैठकमा नआउनेमा स्रोत साधन परिचालन समितिको संयोजक उमेशलाल श्रेष्ठ, खेलस्थल व्यवस्थापन समितिका संयोजक केशवकुमार विष्ट र प्राविधिक समितिका संयोजक गंगाबहादुर थापामगर थिए ।
तयारी समितिका संयोजकनै बैठकमा अनुपस्थित भएपछि खेलकुद मन्त्रालयका सचिव रामप्रसाद थपलियाले खिन्नता प्रकट गरे । उनले समितिको जिम्मेवारीमा बस्ने तर बैठकमा नआउने भन्दै असन्तुष्टि प्रकट गरेका थिए ।
उनले समितिमा बसेर बैठकमा नआउनुको कारण पत्ता लगाउन अनुगमन, निरिक्षण तथा मुल्यांकन समितिसंग आग्रहनै गरे । ‘स्वास्थ्यका कारण भए भिन्ने कुरा हो । तर राष्ट्रको गौरवसंग जोडिएको सागको जिम्मेवारी लिएका व्यक्तिनै अनुपस्थित देखिनुभएको छ ।’ मन्त्रालयका सचिव थपलियाले असन्तुष्टि पोखे ।
के भयो बैठकमा ?
सागको तयारीलाई लिएर दक्षिण एसियाली ओलम्पिक काउन्सिलको बैठक कात्तिक २४ र २५ गते काठमाडौंमा बस्दैछ । सोही समय सागको सेभ द मिसनको समेत बैठक हुनेछ । दुवै बैठकमा सागको तयारीको समिक्षा गर्दै स्थलगत भ्रमण समेत हुनेछ ।
सोही बैठकलाई लिएर नेपाल ओलम्पिक कमिटिको आग्रहमा राखेपले सागको बिषयगत समितिको बैठक राखेको थियो ।
बैठकको सुरुवात गर्दै खेलकुद मन्त्री जगत विश्वकर्माले कार्यक्रमको उद्वेश्य प्रस्टाएका थिए । उनले अहिलेसम्म भएका कामको प्रगति र गर्न बाँकी कामको समिक्षा गर्न समिति संयोजकलाई आग्रह गरेका थिए ।
तयारी समितिले समिक्षा प्रस्तुत गर्नु अघि एनओसी अध्यक्ष जिवनराम श्रेष्ठले काउन्सिलको बैठकमा सबै समितिले सकारात्मक रुपमा प्रस्तुत हुनुपर्ने धारणा राखेका थिए । उनले काउन्सिल र सेभ द मिसनको बैठकमा समितिले प्रस्तुत गर्ने तयारीको ‘गाईडलाईन’ दिएका थिए ।
लगत्तै समिति संयोजक तथा सचिवले आ आफ्ना समितिको काम प्रस्तुत गरेका थिए ।
राष्ट्रिय टिम तयारी समितिका संयोजक रिमबहादुर रानाभाटले ६ सय ७७ खेलाडी सागको प्रशिक्षणमा रहेको जानकारी गराएका थिए । उनले कात्तिक २५ गतेपछि ६ सय ४४ खेलाडी अन्तिम तयारीमा जुट्ने जानकारी बैठकमा गराए ।
यातायात व्यवस्था समितिका सचिव सरोजकुमार पोख्रेलले सागमा एउटै रंगको गाडी प्रयोग गर्न नसकिने बताएका थिए । उनले सहभागी संख्याको विवरण नआएको कारण गाडीको व्यवस्थापन गर्न नसकिएको बताएका थिए । तर आवश्यकताका आधारमा गाडी तयार गर्न समिति तयार रहेको बताए ।
अतिथि सत्कार समितिका संयोजक अमर सिंह शाहले आफ्नो समिति तयारी अवस्थामा रहेको जानकारी गराउँदै आफ्नो समितिलाई स्वयमसेवक, यातायात र सुरक्षा समितिको समन्व्यको आवश्यकता पर्ने बताएका थिए ।
यस्तै, स्वास्थ्य समितिको संयोजक अजय राणाले अर्को हप्ताबाट बन्द प्रशिक्षणमा रहेका राष्ट्रिय खेलाडीको स्वास्थ्य परिक्षण गर्ने जानकारी दिएका थिए । उनले पोखराको स्वास्थ्यको व्यवस्था गर्न समन्व्य गरिरहेको जानकारी दिदै खेलाडीलाई कुन समयसम्म् स्वास्थ्य सेवा दिने भनेर प्रश्न गरेका थिए ।
अवास व्यवस्थापन समितिका संयोजक टासी घलेले भिआईपी अतिथीका लागि पाँच तारे होटलमा व्यवस्था गर्न समिति तयार रहेको बताएका थिए । तर होटल बुकिङ्गको काम तत्काल अघि बढाउनुपर्ने उनले सुझाएका थिए । उनले नियमित टेण्डर प्रक्रियामा जादा होटल व्यवस्थापन गर्न समस्या पर्ने जानकारी गराएका थिए ।
खेल स्थल व्यवस्थापन समितिका सचिव लबभक्त श्रेष्ठले धेरै प्रशिक्षण स्थल र खेल स्थलको निर्माण अन्तिम चरणमा पुगेको जानकारी दिदै बाँकी काम निकट भविष्यमै सकिने जानकारी गराएका थिए ।
अनुगमन समितिका संयोजक अणप्रसाद न्यौपानले विभिन्न कागजात बनाएर अनुगमनको तयारी गरिरहेको बताउँदै केही दिनमा अनुगमन सुरु गरिने बताए ।
खेल सामाग्री, उपकरण तथा पोशाक व्यवस्थापन समितिका संयोजक पुरेन्द्रविक्रम लाखेले सरकारको खरिद प्रक्रियाले समय अपुग देखिने बताएका थिए । उनले फास्ट ट्रयाकबाट सामान आपुर्ती गर्न समिति तयार रहेको जानकारी गराएका थिए ।
प्राविधिक समितिका सचिव अर्जुन विकले धेरै खेलको ह्याण्ड बुक बनिसकेको जानकारी दिदै खेल तालिका बन्ने क्रममा रहेको बताएका थिए । उनले खेलाडीको दर्ता हुने बित्तिकै समितिको काम अन्तिम चरणमा पुग्ने जानकारी गराएका थिए ।
सुरक्षा समितिकातर्फबाट डीआईजी दिपक थापाले उपनिर्वाचनले जनशक्तिको कमी हुने देखिएपनि जनशक्तिको व्यवस्थापन गरेर सुरक्षामा कुनै कमि हुन नदिने बताएका थिए ।
समारोह समितिकातर्फबाट सचिव कुलबहादुर थापाले उद्घाटन र समापनलाई भब्य र आकर्षक बनाउन समितिले योजना बनाईरहेको जानकारी गराएका थिए ।
प्रचार समितिका संयोजक शिव कोईरालाले सागलाई लक्षित गर्दै काठमाडौं र पोखरामा चाँडै मिडिया सेन्टर स्थापना गरिने बताए । उनले सागको भव्यता बाहिर प्रचार गर्न समितिले कुनै कसर बाँकी नराख्ने उल्लेख गरेका थिए ।
स्वयम सेवक समितिका सचिव प्रेम मल्लले काठमाडौं र पोखरामा स्वयम सेवक परिचालनको तयारी गरिरहेको बताएका थिए । उनले केही दिनमै स्वयम सेवकको खाका प्रस्तुत गर्ने जानकारी बैठकमा गराएका थिए ।
एन्टी डोपिङ्ग समितिका संयोजक सरोज श्रेष्ठले बिज्ञहरुको अभाव भएपनि समितिको काम अघि बढेको जानकारी गराएका थिए । सागका स्वर्णधारी र कीर्तिमानधारी खेलाडीको डोपिङ्ग परिक्षण गर्ने योजना समितिले बनाएको बताएका थिए ।
यस्तै स्रोत साधान परिचालन समितिले नीजि विज्ञापनको खोजी गर्ने काम अघि बढाएको बैठकमा जानकारी गराएको थियो । साग आयोजना अगाडी वृहत कार्यक्रम आयोजना गर्दै व्यापारिक संस्थालाई प्रतियोगितामा जोड्न सकिने राय बैठकमा प्रस्तुत गरिएको थियो ।
बैठकको समापन गर्दै सदस्य सचिव रमेश सिलवालले साग आयोजनाबाट पछाडी फर्कने अवस्था नरहेको भन्दै ४९ दिनमा सागलाई सम्पन्न गरेर फिर्ता पठाउनुपर्ने बताए ।
उनले कसैको कुरा र हल्लाको पछाडी नलाग्न सुझाव दिदै राष्ट्रको छवि राम्रो बनाउने अभियानमा जुट्न सबैलाई आग्रह गरे । उनले समस्या देखाएर भाग्ने भन्दा समाधानको बाटो सहित अघि बढ्न समिति संयोजकलाई आग्रह गरेका थिए ।
-1750070144.JPG)
-1750064258.webp)
-1750047432.webp)
