एन्फाका पूर्व अध्यक्ष थापाको आत्मकथा आउने

काठमाडौं । अखिल नेपाल फुटबल संघ (एन्फा) का पूर्व अध्यक्ष गणेश थापाको आत्मकथा आउने भएको छ ।

एसियाली फुटल महासंघ (एएफसी) का पूर्व उपाध्यक्ष तथा नेपाली राष्ट्रिय फुटबल टिमका पूर्व कप्तान समेत रहेका थापाले आइतबार पत्रकार सम्मेलन गर्दै आत्मकथा ल्याउन लागेको जानकारी गराएका छन् ।

खेलकुद पत्रकार हिमेशरत्न बज्राचार्यको सहलेखन र सम्पादनमा प्रकाशित हुने थापाको आत्मकथा बुक-हिल पब्लिकेसनले प्रकाशन गर्नेछ । आत्मकथा आगामी फागुनमा सार्वजनिक गरिने छ ।

यस्तै पत्रकार सम्मेलनमा थापाको आत्मकथाको आवरण सार्वजनिक गरिएको थियो ।

थापाकाे आत्मकथामा नेपाली फुटबलमा केन्द्रित गरिएको बताईएको छ । थापासँग जोडिएको भ्रष्ट्राचार अभियोगमा लेखा समितिले गरेको निर्णय, अख्तियार दुरुपयोग अनुसन्धान आयोगको निर्णय, फिफाको प्रतिबन्ध, एएफसीका तत्कालिन अध्यक्ष महमद बिन हमामसँगको सम्बन्धबारेको विषय समेटिएको छ ।

यस्तै राष्ट्रिय टिममा रहदाँ नेपाललाई दिलाएका सफलता र एन्फा अध्यक्ष हुदाँकाे रोचक विषयवस्तु आत्मकथामा रहनेछ ।

कार्यक्रममा बोल्दै थापाले आत्मकथामा आफुले जिवनका विविध घटनालाई ईमान्दारपुर्वक राखेको दाबी गरेका छन् ।