पारसकाे राजिनामा, सामाजिक सञ्जालमा भुँईचालाे !

काठमाडौं । नेपाली राष्ट्रिय क्रिकेट टिमका कप्तान पारस खड्काले मंगलबार अप्रत्याशित रुपमा कप्तानीबाट राजिनामा दिए ।

अचानक पारसको राजिनामा आएसँगै सामाजिक सञ्जालमा ठुलो चर्चा भएको छ ।

पारसले कप्तानी त्यागेको खबर बाहिरिएपछि फेसबुक, ट्वीटर लगायतका सामाजिक सञ्जालमा धेरैले आश्चर्य प्रकट गरेका छन् । कतिपयले पारसले उपयुक्त समयमा कप्तानी त्यागेको उल्लेख गरेका छन् ।

पारसले कप्तानी पद छाडेपछि कतिपयले क्यानको नयाँ निर्वाचननै पारसले कप्तानी छाड्ने मुख्य कारण भएको अनुमान लगाएका छन् ।

साउर सिक्देलले क्यानको अकर्मण्यताकोविरुद्ध खुलेर बोल्नेमा पारस सबैभन्दा अगाडि रहेको र फेरि पनि क्यानमा तिनै मानिसहरुको आगमन भएको कारण राजिनामा आएको लेखेका छन् ।

यस्तै ट्वीटरमा ट्वीटर मन्त्री लगायतले १० वर्ष अभाव र तनाबका बीचमा सफल कप्तानको भूमिका निर्वाह गर्ने पारस साहसी कप्तान हुन् भन्ने आसयको ट्वीट गरेका छन् ।

यस्तै सञ्जालमा पारसको राजिनामालाई भारतीय क्रिकेट बोर्ड (बीसीसीआई) प्रमुख नियुक्तको विषयसँग पनि जोडेर हेरिएको छ ।

भारतमा पूर्व कप्तान सौरभ गांगुली बीसीसीआईको प्रमुख नियुक्त हुने दौडमा रहँदा कप्तानले पदबाट राजिनामा दिनु खासै अनौठो नभएको र भविष्यमा गांगुली जस्तै पारसलाई क्रिकेटको सर्वोच्च निकायमा देख्न सकिने धेरैको बुझाइछ ।

यस्तै संयुक्त अरब ईमिरेट्सका खेल पत्रकार पाउल रेड्लीले पनि पारसको राजिनामा प्रति आश्चर्य प्रकट गरेका छन् ।

समग्रमा सामाजिक सञ्जालमा पारसको राजिनामाको बिषयलाई लिएर मिश्रित प्रतिकृया देखिएको छ ।