क्यान निर्वाचन – त्रिकोणात्मक प्रतिस्पर्धा !

काठमाडौं । नेपाल क्रिकेट संघ (क्यान) को नयाँ नेतृत्वका लागि आन्तरिक दौडधुप सुरु भएको छ ।

अन्तराष्ट्रिय क्रिकेट परिषद आईसीसीले गठन गरेको स्वतन्त्र कमिटिले जिल्ला र प्रदेशको निर्वाचन सम्पन्न गरे लगत्तै केन्द्रिय निर्वाचन शुक्रबार र शनिबार हुदैछ ।

नेपाली क्रिकेटको नेतृत्व हत्याउन तीन समूह आन्तरिक दौडधुपमा व्यस्त छ ।

लामो समय नेपाली क्रिकेटको नेतृत्व गरेको विनयराज पाण्डे, निलम्बित क्यानका अध्यक्ष चतुरबहादुर चन्द र राखेप सदस्य बिनोद मैनाली नयाँ नेतृत्वका लागि दौडधुपमा व्यस्त छन् ।

जिल्ला र प्रदेश गरि ५९ प्रतिनिधिले क्यानको आसन्न साधारण सभामा भाग लिनेछन् । सहभागी प्रतिनिधिमा बहुमत (३० मत) जुटाउन सक्ने समूहले नेपाली क्रिकेटको नेतृत्व गर्नेछ ।

पर्सी शुक्रबार औपचारिक उद्घाटन हुने साधारण सभा शनिबार सकिनेछ । प्रमुख अतिथीका रुपमा खेलकुद मन्त्री जगत विश्वकर्मा र राखेप सदस्य सचिव रमेश सिलवाल रहनेछन् ।

स्वतन्त्र कमिटिले निर्वाचन मण्डलको भुमिका निर्वाह गर्नेछ । राखेप प्रतिनिधिले निर्वाचनलाई परिवेक्षण गर्नेछन् । परिवेक्षकको रुपमा आईसीसीका उपाध्यक्ष ईमरान ख्वाजा सहितको टिम सहभागी हुनेछ ।

५९ मतको खेल !

३९ जिल्ला र ७ प्रदेशका ५९ प्रतिनिधिले क्यानको नयाँ नेतृत्व चयन गर्नेछन् । ३९ जिल्लाबाट १–१ जना प्रतिनिधि र बाँकी प्रतिनिधि प्रदेशबाट आएका छन् । जसले अध्यक्ष, उपाध्यक्ष, सचिव, कोपाध्यक्ष सहित १७ सदस्यीय कार्यसमिति चयन गर्नेछ ।

प्रदेश १ संग ५ जिल्ला सहित ८ भोट रहेको छ । जिल्ला प्रतिनिधिको रुपमा अर्जुन पौडेल, लाक्पा लामा, रोशन बुढाथोकी, कैलाश विष्ट र शम्भु शर्मा छन् । प्रदेश प्रतिनिधिको रुपमा नेकपाको भातृ संगठन युवा संघका केन्द्रिय नेता मिंग्मा दण्डु शेर्पा, शिरिष उपाध्याय र मनोज कटुवाल छन् ।

प्रदेश २ संग ८ जिल्ला सहित १२ भोट रहेको छ । पुर्व कप्तान पवन अग्रवाल जिल्ला प्रतिनिधिको रुपमा आउँदा हिरा भगत, पवन गुप्ता, दाउद अन्सारी, आयुष श्रेष्ठ, सुनिल महासेठ, रोशनकुमार सिंह र माधव कर्माचार्य जिल्ल प्रतिनिधि बनेर आएका छन् । प्रदेश प्रतिनिधिको रुपमा अनिल शर्मा, आकाश पाण्डे, मुर्तुजा हवारी र सुनिलकुमार शाह छन् ।

प्रदेश ३ संग ६ जिल्ला सहित ९ भोट रहेको छ । विनयराज पाण्डेको प्रभाव रहेको प्रदेशमा दिपेन्द्र ढकाल, कैलाश प्रधान, नरेश राना, अमितबिर पाण्डे, उपेन्द्र भट्टराई छन् । प्रदेश प्रतिनिधिको रुपमा प्रफुल्ल वैद्य, किरण क्षेत्री र दर्गाराज पाठक रहेका छन् ।

निकै महत्वपुर्ण मानिएको प्रदेश ४ संग ४ जिल्ला सहित ६ भोट रहेको छ । क्रिकेट टिमका प्रशिक्षक जगत टमाटा प्रतिनिधि रहेको जिल्लामा सुदिप शर्मा, सन्जयकान्त सिग्देल, राजबाबु श्रेष्ठ रहेका छन् । यस्तै ऋषीराम गौतम र प्रकाश पौडेल प्रदेश प्रतिनिधि छन् ।

प्रदेश ५ र ६ संग ८ जिल्ला सहित १२ भोट छ । बिनोदकुमार मैनाली जिल्ला प्रतिनिधिको रुपमा आउँदा अशोकनाथ प्याकुरेल, प्रशान्तबिक्रम मल्ल, राजेश श्रेष्ठ, प्रदीप मजगैया, प्रकाश गैरे र कृण्णप्रसाद श्रेष्ठ र प्रकाश गैरेले जिल्लाबाट प्रतिनिधित्व गरेका छन् । प्रदेश ६ को सुर्खेत प्रतिनिधिको रुपमा पदमबहादुर खड्का रहेका छन् । प्रदेश प्रतिनिधिको रुपमा सन्जय गुरुङ, सन्जयराज सिंह, श्रीधर केसी र विनयराज भण्डारी रहेका छन् ।

प्रदेश ७ संग ८ जिल्ला सहित १२ भोट रहेको छ । चुतुरबहादुर चन्द प्रतिनिधि जिल्लाबाट बिक्रम विष्ट, जयन्ती भट्ट, बासुदेव जोशी, दिनेश सिंह, धिरेन्द्र साउद, बिरेन्द्रबहादुर चन्द र प्रबिन्द्रबहादुर धामी प्रतिनिधि रहेका छन् ।

प्रदेशबाट हरि रेग्मी, हरिप्रसाद उप्रेती, तेजप्रकाश भट्ट र आशिषकुमार खत्री प्रतिनिधि छन् । 

को छ बलियो ?

चुनावी सरगर्मी बढ्दै जादाँ मुख्य तीन समूह आन्तरिक जोड घटाउनमा व्यस्त छ ।

सुरुवाती हिसावमा निलम्बित क्यानका अध्यक्ष चतुरबहादुर चन्द समूह बलियो देखिएको छ । प्रदेश नम्बर ७, ५ र ६ मा चतुरको अवस्था अरु भन्दा राम्रो छ ।

प्रदेश नम्बर २ बाट समेत उनले राम्रो मत ल्याउने एक जिल्ला प्रतिनिधि दाबी गर्छन् । बहुमत प्रदेशमा राम्रो पकड बनाएका चतुर केन्द्रिय निर्वाचनमा बहुमतको निकै नजिक छन् ।

जिल्ला र प्रदेश प्रतिनिधिसग सहज सम्पर्क बनाएका चतुरले स्पष्ट बहुमतको दाबी सहित चुनावी मैदानमा होमिएका छन् ।

चन्दले सचिवमा अशोकनाथ प्याकुरेललाई समावेश गर्दै प्यानल उतार्ने तयारी गरेका छन् ।

चतुरबहादुर चन्द ईतरको समुहले अंक गणितमा चन्द पक्ष बलियो देखिएपनि भनिए जस्तो सुविधाजनक बहुमत नभएको दाबी गर्छ । तर चतुर समूहसंग कम्तिमा २५ मत रहेको भने स्विकार गर्न तयार देखिन्छ ।

दोस्रो शक्ति – नेकपा

क्यानको आसन्न निर्वाचनमा सत्तारुढ दल नेकपा दोस्रो शक्तिको रुपमा देखिन्छ । क्रिकेटमा नेकपाको नेतृत्व गर्ने विनोद मैनालीले दोस्रो समूहलाई नेतृत्व गरिरहेका छन् । उनले महासचिवमा नेकपाका युवा नेता मिंग्मा दण्डु शेर्पालाई प्रस्ताव गर्दै संयुक्त प्यानल निर्माणको तयारीमा जुटेका छन् ।

विनोद यसअघि चुतर समूहका उपाध्यक्ष थिए । तर उनले यसपटक चतुर समूहमा जाने सम्भावना समाप्त भएको बताईसकेका छन् । बरु चन्द ईतरका समुहलाई एकजुट बनाएर चुनावमा जाने वा पार्टीकै निर्देशन र तयारीमा वेग्लै प्यानल खडा गर्ने बिषयमा मैनालीले आन्तरिक छलफल चलाएका छन् ।

सरकारी पक्ष भएका कारण दोस्रो शक्तिको रुपमा नेकपा समूह आफुसंग कम्तिमा १८ भोट रहेको दाबी गर्छ ।

विनयराज पाण्डे टिम

नेपाली क्रिकेटका पुराना खेलाडी विनयराज पाण्डे अध्यक्षको उम्मेदवार सहित चुनावी मैदानमा उत्रिएका छन् । तर उनले टिम खडा गर्न सकेका छैनन् ।

महासचिवमा पवन अग्रवाललाई लिएर चुनाव लड्ने उनको ईच्छा छ । तर अंक गणितमा कमजोर देखिएको तेस्रो शक्ति एक्लै टिम खडा गरेर चुनाव जित्न सक्ने अवस्थामा छैन । पाण्डे समुहले करिब १० मत प्रभावित पार्न सक्ने बाँकी दुइ समुहकाे बुझाइ छ । 

नेकपा–विनयको गठबन्धनको प्रयास

बहुमतको नजिक देखिएका चन्द समुहलाई रोक्न सत्तारुढ दल नेकपा र विनराज पाण्डेको समूहले संयुक्त प्यानल बनाउने गृहकार्यलाई अघि बढाएको छ । एक्लै चुनाव लडेर जित्न नसक्ने दुवै पक्ष स्विकार गर्छ । दुवै पक्षलाई मिलाएर प्यानल बनाउने कामको अगुवाई राखेप सदस्य सचिव रमेश सिलावालले गरिरहेका छन् ।

सदस्य सचिव सिलवालले पाण्डेलाईनै सरकारको उम्मेदवारको रुपमा खडा गर्दै टिम बनाउने कसरत गरेका हुन् ।

तर पाण्डे भने क्रिकेटका नयाँ अनुसार मिंग्मा दण्डुलाई सचिवमा स्विकार गर्न तयार छैनन् । शेर्पा सदस्यको रुपमा क्रिकेटमा आउनुपर्ने उनको सुझाव छ ।

पाण्डे आफै पुर्व कप्तान पवन अग्रवाललाई सचिवमा लिएर अघि बढ्न चाहन्छन् । पुर्व कप्तान पवनले कुनै पदमा दाबी गरेका छैनन् । सोही कारण पाण्डेले स्विकार गर्ने नेकपाकै परिचित अनुहारलाई सचिवमा राख्दै पाण्डे नेतृत्वको प्यानल उठाउने सरकारी पक्षको तयारी छ ।

पाण्डेसंग सहकार्य नभए विनोद मैनाली नेतृत्वमा नयाँ टिम खडा गर्ने गरि समेत छलफल अघि बढेको नेकपाको एक नेताले खेलपाटीलाई बताए । नेकपामा खेलकुद हेर्ने गणेशमान पुन, पुरुषोत्तम पौडेल समेत पाण्डेलाई नेतृत्वमा समावेश गर्दै चुनावी टिम खडा गर्ने तयारीमा छन् ।

पाण्डेसंग मिलेरमात्र चतुर समूहलाई निर्वाचनमा टक्कर दिन सक्ने सरकार पक्षिय टिमको बुझाई छ ।