काठमाडौं । नेपाली राष्ट्रिय भलिबल टोलीका पूर्व सदस्य तथा त्रिभुवन आर्मी क्लबका ओपन स्पाइकर मान बहादुर श्रेष्ठ एक साता कोर्ट बाहिर रहने भएका छन् ।
पहिलो संस्करणको प्रकाश दाहाल स्मृति प्रगतीशिल युवा नेपाल कप राष्ट्रिय खुल्ला पुरुष भलिबल प्रतियोगिताको दौरान चोट बोकेका मान एक साता टिम बाहिर रहने भएका हुन् ।
नयाँ बसपार्कस्थित ढोरपाटन क्लबको कोर्टमा सोमबार नेपाल पुलिस क्लबविरुद्धको फाइनलमा मानले चोट बोकेका थिए । खेलको दोस्रो सेट चलिरहदा मान चिप्लिएर लडेका थिए । उनको देब्रे खुट्टाको एन्कलमा चोट लागेको छ ।
चोट बोकेपछि अस्पताल पुगेका मानलाई एक हप्ता आराम गर्न निर्देशन दिएको छ । उनको चोट ठिक हुन कम्तिमा एक हप्ता लाग्ने छ ।
'अस्पतालले एक हप्ताको लागि आराम गर्न भनेको छ । अहिले बिस्तारै ठिक हुँदै गएको छ,' आर्मीका पूर्व कप्तान समेत रहेका मानले खेलपाटीसँग भने ।
चोट ठिक हुन एक हप्ता लाग्ने भएपछि मानले पुलिसविरुद्धको शनिबार तय भएको फाइनल खेल समेत गुमाउने छन् ।
'अस्पतालले एक हप्ता आराम गर्नु भनेको छ । त्यसैले यो फाइनल खेल गुमाउछु,’ मान थपे ।
यसअघि सोमबार वर्षाको कारण तेस्रो सेट चलिरहदा फाइनल खेल स्थगित भएको थियो । खेल रोकिनुअघि पहिलो सेट आर्मीले २५-२३ ले जितेको थियो भने दोस्रो सेट पुलिसले २५-२० ले जितेको थियो । तेस्रो सेटमा आर्मी २१-१९ ले पछि रहेको थियो ।
चिरपरिचित प्रतिद्वन्दी पुलिसविरुद्ध मान नहुने भएपछि आर्मीलाई केहि दबाब थपिएको छ । किनकी मान प्रेरित आर्मी प्रतियोगितामा अपराजित रहेको छ ।
विभागीय कारबाहीपछि टिममा मान फर्किएपछि आर्मीले पाचौं संस्करणको प्रधानसेनापति कप राष्ट्रिय भलिबलको उपाधि जितेको थियो । त्यसअघि मान नहुँदा आर्मीले आठौं राष्ट्रिय खेलकुद र ताप्लेजुङको पाथिभारा भलिबलको फाइनलमा पुलिससँग हार ब्यहोरेको थियो ।
यस्तै आठौं राष्ट्रिय नखेलेकोको कारण मान घरेलु मैदानमा सम्पन्न एभिसी सेन्ट्रल जोन पुरुष भलिबल च्याम्पियनसिपको टिम बाहिर रहेका थिए ।
