आर्मी र पुलिसबीचको उपाधि भिडन्त शनिबार

काठमाडौं । वर्षाको कारण स्थगित पहिलो संस्करणको 'प्रकाश दाहाल स्मृति प्रगतिशिल युवा नेपाल कप' राष्ट्रिय खुल्ला पुरुष भलिबल प्रतियोगिताको फाइनल खेल शनिबार हुने भएको छ । 

नयाँ बसपार्कस्थित ढोरपाटन क्लबको खेल मैदानमा आज हुने भनिएको त्रिभुवन आर्मी र नेपाल पुलिस क्लबबीचको फाइनल खेल दिनभर वर्षा भएपछि शनिबारसम्मको लागि सारिएको आयोजकले जनाएको छ ।

यसअघि सोमबार वर्षाको कारण नै खेल जारी रहदा आर्मी र पुलिसबीचको भिडन्त स्थगित गरिएको थियो र आजको लागि सारिएको थियो । तर, आज पनि दिन भर वर्षा भएपछि फाइनल खेल शनिबारसम्मको लागि सारिएको हो ।   

वर्षाले खेल स्थगित हुनुअघि सोमबार दुवै टोलीले एक एक सेट जितेका थिए । खेलमा पहिलो सेट आर्मीले २५-२३ ले जितेको छ भने दोस्रो सेट पुलिसले २५-२० ले जितेको छ । तेस्रो सेटमा आर्मी २३-१९ ले पछि रहेको छ ।

प्रतियोगितामा गण्डकी प्रदेश भने तेस्रो भएको छ । सोमबार भएको खेलमा विभागीय टिम एपीएफ क्लबलाई ३-२ को सेटमा पराजित गर्दै गण्डकी तेस्रो भएको हो ।

प्रगतिशील यूवा नेपालको योजनामा जारी प्रतियोगिताको विजेताले ५ लाख रुपैया हात पार्ने छन् । यस्तै दोस्रोले ३ लाख, तेस्रोले १ लाख र चौथोले ५० हजार रुपैया पाउने छन् ।

यस्तै प्रतियोगिताको सर्वोत्कृष्ट खेलाडीले मोटरसाइकल पाउने आयोजकले जनाएको छ । त्यसबाहेक स्पाइकर, ब्लकर, डिफेन्डर, सर्भर र प्रशिक्षकलाई पनि पुरस्कृत गरिने छ ।