काठमाडौं । अखिल नेपाल फुटबल संघ एन्फा आर्थिक संकटमा परेको छ । सोही कारण राष्ट्रिय फुटबल टिमका खेलाडीले विगत ४ महिना देखिको तलब पाएका छैनन् । आर्थिक संकट देखिएपछि एन्फाले पुरुष र महिला खेलाडीको पछिल्लो चार महिनाको तलब उपलब्ध गराउन सकेको छैन ।
राष्ट्रिय टिमको प्रशिक्षणमा रहेका खेलाडीले मासिक रुपमा एन्फाबाट उपलब्ध हुने तलब समयमा नपाएको गुनासो गरेका छन् । पुरुषको सिनियर टिम विश्वकप छनोटको तयारीमा व्यस्त छ । भने पुरुषको २३ बर्ष मुनिको टोली र महिला टिम आसन्न दक्षिण एसियाली खेलकुद प्रतियोगिता सागको तयारीमा व्यस्त छन् ।
अहिले घरेलु फुटबलमा कुनै पनि प्रतियोगिता भैरहेको छैन । यस्तो अवस्थामा क्लबहरुले पनि खेलाडीलाई फुकुवा गरेका छन् । विगत ४ महिनादेखि एन्फाले उपलब्ध गराउने तलब समेत रोकिएपछि राष्ट्रिय टिमका खेलाडी समस्यामा परेका छन् ।
एन्फाले विगतमा पुरुष र महिला टिमका खेलाडीको तीन–तीन महिनाको तलब एकैपटक बैकमा राखिदिने गरेको थियो ।
पुरुष टिमका खेलाडीले मासिक १५ हजार र महिला टिमका सदस्य मासिक ७ हजार तलब पाउँदै आएका छन् ।
यसअघि समेत एन्फाले खेलाडीको तलब ७ महिनासम्म रोकेर राखेको थियो ।
‘बिगत ४ महिनादेखि तलब पाएका छैनौं । पहिला पनि ७ महिना रोकिएको थियो । धेरै आग्रह गरेपछि ३ महिनाको पायौ ।’ नाम नखुलाउने शर्तमा एक खेलाडीले भने, ‘फेरी चार महिनादेखि तलब रोकिएको छ ।’
एन्फा वरिष्ठ उपाध्यक्ष पंकज नेम्वाङले भने खेलाडीको तलब नपाएको बिषयमा आफुलाई कुनै जानकारी नभएको खेलापटीलाई बताए । ‘खेलाडीले तलव नपाएको विषयमा मलाई कुनै जानकारी छैन ।’ उनले भने ।
वरिष्ठ उपाध्यक्ष मात्र नभएर एन्फाका अन्य पदाधिकारीले समेत खेलाडीले तलब नपाएको बिषय आफुलाई जानकारी नभएको बताएका छन् । प्रवक्ता समेत रहेका किरण राईले खेलाडीले तलब नपाएको बिषय आफुलाई थाहा नभएको बताए ।
स्रोतका अनुसार फुटबल संघ एन्फामा अहिले आर्थिक संकट छ । विभिन्न शीर्षकमा धेरै पैसा खर्च हुदाँ खेलाडीलाई तलब दिन समेत समस्या परेको छ ।
‘महिला साफ आयोजना गर्दानै धेरै पैसा खर्च भएको छ । करिब डेढ करोड जति पैसा खर्च भएको देखिन्छ । प्रशिक्षकलाई दिने तलब समेत एन्फाले दिन परेको छ । यसअघि प्रशिक्षकलाई राखेपबाट ५० लाख आउने गर्दथ्यो । अहिले १० लाख मात्र छ ।’ स्रोतले भन्यो, ‘एन्फाले धेरै कार्यक्रम गर्दा ब्यालेन्स रित्तिएको अवस्था छ । प्रायोजकबाट समेत पैसा नउठ्दा एन्फालाई आर्थिक संकट आईलागेको छ ।’
एन्फा महासचिव इन्द्रमान तुलाधरले भने खेलाडीले ४ महिनाबाट तलब नपाएको स्विकार गर्दै एन्फाले चाँडै सो रकम निकासा गर्ने बताए ।
‘अध्यक्ष बाहिर हुनुहुन्थ्यो । त्यसैले गर्दा रोकिएको हो । अब केही दिनमा दिनेछौं ।’ उनले भने ।
‘तीन–तीन महिनामा दिने गरेका छौं । महिला टिमको पनि सँगै दिन्छौ । खेलाडीले चाँडै तलब पाउनेछन् ।’ महासचिव तुलाधरले भने ।
राष्ट्रिय पुरुष टिम अहिले सन् २०२२ मा कतारमा आयोजना हुने विश्वकप र सन् २०२३ मा चीनमा हुने एएफसी एसियन कपको तयारीमा रहेको छ । यस्तै महिला टिम भने घरेलु भुमिमा आयोजना हुने १३ औं दक्षिण एसियाली खेलकुद (साग) को तयारीमा छ ।
