एसियन गेम्सको तयारी गर्न तेक्वान्दो टोली कोरिया प्रस्थान

काठमाडौं ।  इन्डोनेसियामा हुने १८ औं एसियन गेम्सको तयारीका लागि पुम्से तेक्वान्दो टोली शनिबार दक्षिण कोरियाको सिओल प्रस्थान गरेका छन् । तयारीका लागि ४ खेलाडीसहित ७ सदस्यीय टोली कोरिया गएका हुन् ।

बैदेशिक प्रशिक्षणमा जाने खेलाडी टोलीको पुरुषमा कमल श्रेष्ठ तथा महिलामा पार्वती गुरुङले ३० वर्षमुनि व्यक्तिगत स्पर्धामा प्रतिस्पर्धा गर्नेछन् । समूहगत पुम्सेमा पार्वतीसहित सिना मादेन र निता गुरुङले सहभागिता जनाउने छन् । प्रशिक्षकमा ब्रदीप्रसाद घिमिरे र नोर्बु लामा तथा व्यवस्थापकमा नेपाल तेक्वान्दो संघका सदस्य रामचन्द्र श्रेष्ठ रहेका छन् ।

आगामी भदौ २ गतेदेखि सुरु हुने एसियन गेम्सको तयारीका लागि वैदेशिक तयारीमा जाने तेक्वान्दोको पुम्से टोली अन्तिम हो । यसअघि गेरोगीतर्फ प्रतिस्पर्धा गर्ने खेलाडीहरु सिओल पुगिसकेका छन् । पहिलो चरणमा सागर गुभाजु, वीरबहादुर महरा, ज्ञानेन्द्र हमाल, अनोज पुजारी, अस्मिता खड्का, निमा गुरुङ र ज्ञानी चुनारा तथा प्रशिक्षक संगीना वैद्य बैशाख २० गते सिओल गएका थिए । त्यसपछि करिब २ साताअघि खेलाडी भुपेन श्रेष्ठ, संगीता बस्याल र निशा रावल तथा प्रशिक्षक दीपक विष्ट सिओल प्रस्थान गरेका थिए ।

टोलीलाई राष्ट्रिय खेलकुद परिषद् (राखेप) का सदस्य–सचिव केशवकुमार विष्टले शनिबारै एक कार्यक्रमबीच बिदाइ गरे । बैदेशिक प्रशिक्षणपछि नेपाली टोली एसियन गेम्समा सहभागी हुन सिओलबाटै अगस्ट २ तारिख इन्डोनेसिया जाने कार्यक्रम छ ।

एसियाली खेलकुदमा नेपालले हासिल गरेको सबैभन्दा ठूलो पदक रजत हो । त्यो सफलता तेक्वान्दोकै सविता राजभण्डारी (हाल अमेरिका) ले १९९८ मा थाइल्यान्डको बैंककमा भएको १३ औं एसियाडमा हात पारेकी थिइन् ।

एसियाली खेलकुदमा नेपालले १९८६ मा दक्षिण कोरियाको सिओलमा भएको १० औं संस्करणदेखि तेक्वान्दोमा नियमित सहभागिता जनाउदै आएको छ । सुरुको सहभागितामै नेपालले तेक्वान्दोमा ४ कांस्य जितेको थियो । त्यत्ति बेला विधान लामा, राजकुमार राई, राजकुमार बुछे र राजकुमार गोछेले नेपाललाई कांस्य दिलाएका थिए ।