कोरियामा नेपाललाई एक स्वर्ण र एक रजत

काठमाडौं । दक्षिण कोरियामा सम्पन्न पोहाङ युनिभर्सिटी अन्तर्राष्ट्रिय तेक्वान्दो च्याम्पियनसिपमा नेपालले एक स्वर्ण र एक रजत पदक जितेको छ । च्याम्पियनसिपको अन्तिम दिन शुक्रबार नेपालले पाँच खेलाडी सम्मलित टिम इभेन्ट्समा एक स्वर्ण र एक रजत पदक जितेको हो ।

पोहाङमा भएको च्याम्पियनसिपमा नेपालको पुरुष टिमले फाइटतर्फ स्वर्ण पदक जितेको हो । बाई पाएर सेमिफाइनलमा पुगेको नेपालले इन्सन युनिभर्सिटीलाई हराएर फाइनल पुगेको थियो । फाइनलमा नेपालले कोरियाको टिमलाई हराएर स्वर्ण पदक जितेको नेपाली टोलीका मुख्य प्रशिक्षक दिपक बिष्टले जानकारी गराए ।

यस्तै नेपालको महिलाको टिम फाइटमा रजत पदक जितेको हो । महिला टिम इभेन्ट्सको फाइनलमा नेपाल चीनको टिमसंग पराजित हुँदै रजत पदकमा समेटिएको थियो । महिला टिम इभेन्ट्समा तीन टोलीको सहभागिता रहेको थियो ।

यो च्याम्पियनसिपमा यसअघि नेपालका पाँच खेलाडीले रजत र चार खेलाडीले कास्य पदक जितेका थिए । महिलातर्फ निशा रावल, निमा गुरुङ र अस्मिता खड्काले रजत जितेका थिए । यस्तै संगीता बस्यालले कास्य पदक जितिन् । पुरुषतर्फ अनुज पुजारी र भुपेन्द्र श्रेष्ठले रजत जित्दा सागर गुभाजु, वीर बहादुर महरा र ज्ञानेन्द्र हमालले कास्य पदक जितेका थिए ।

एसियन गेम्सको तयारीमा कोरियामा रहेका नेपाली तेक्वान्दो टोलीले आगामी हप्ता जेजु कोरिया ओपनमा प्रतिस्पर्धा गर्नेछ । जसमा दुई पुरुष र दुई महिला गरी चार खेलाडीले खेल्ने छन् ।

आगामी अगस्टमा हुने एसियन गेम्सको तयारीमा रहेका नेपाली टोलीलाई ओलम्पियनद्वय संगिना बैद्य र दीपक विष्टले कोरियामै प्रशिक्षण दिईरहेका छन् ।  नेपाली टोली आगामी १५ अगस्टमा एसियन गेम्समा सहभागी हुन कोरियाबाटै इन्डोनेसिया प्रस्थान गर्ने कार्यक्रम रहेको छ ।