विश्वकप जितेका ६ खेलाडी, जसले आईपीएल जितेनन्

एजेन्सी । क्रिकेटको महाकुम्भ आईसीसी एकदिवसीय विश्वकप क्रिकेटको १२ औं संस्करण इंग्ल्याण्डमा जारी छ ।

विश्वकप क्रिकेटमा अष्ट्रेलियाले सर्वाधिक ५ पटक उपाधि जितेको छ । यस्तै भारत र वेष्ट इण्डिजले समान २/२ पटक उपाधि जित्दा पाकिस्तान र श्रीलंकाले १/१ पटक उपाधि हात पारेका छन् ।

विश्वकपपछि विश्व क्रिकेटमा इण्डियन प्रिमियर लिग (आईपीएल) क्रिकेट निकै लोकप्रिय रहेको छ । किनकि आईपीएल खेल्ने विश्वकप विजेता खेलाडीहरुको पनि सपना हुने गर्छ ।

तर, कतिपय विश्वकप विजेता खेलाडीहरुले आईपीएलको उपाधि जित्न सकेका छैनन् । राष्ट्रिय टिमबाट विश्वकप जितेपनि उनीहरु आईपीएलमा असफल हुँदै आएका छन् ।

विश्वकप जितेर पनि आईपीएलको उपाधि जित्न नसक्ने ६ खेलाडीको सूची यस प्रकार रहेको छ ।

१. विराट कोहली

भारतले विराट कोहलीको कप्तानीमा १२ औं संस्करणको विश्वकप खेलिरहेको छ । भारतले सन् २०११ को विश्वकपको उपाधि जित्दा कोहलीले महत्वपूर्ण भूमिका खेलेका थिए ।

तर, कोहली आईपीएलमा भने अभागी खेलाडीको रुपमा चिनिदै आएका छन् । आईपीएलको पहिलो सिजनबाटै रोयल च्यालेन्जर्स बैंगलोरबाट खेलेका कोहलीले उपाधि जित्न सकेका छैनन् ।

आईपीएलको १२ औं संस्करणसम्म ३ पटक फाइनल खेलेपनि कोहलीले उपाधि उचाल्न सकेका छैनन् ।

२. स्टिभ स्मिथ

अष्ट्रेलियाका पूर्व कप्तान स्मिथले सन् २०१५ मा विश्वकप क्रिकेटको उपाधि जितेका थिए । माइकल क्लार्कको नेतृत्वमा उनले विश्वकप जितेका थिए । जुन विश्वकप अष्ट्रेलियाको पाँचौं उपाधि रहेको थियो ।

उक्त विश्वकपमा स्मिथले ८ खेल खेल्दै ४ सय २ रन बनाएका थिए । तर, स्मिथले आईपीएलको उपाधि भने उचाल्न सकेका छैनन् ।

सन् २०१० मा आईपीएलमा डेब्यु गरेका स्मिथले ४ फरक टिमबाट खेलिसकेका छन् । सन् २०१७ मा पुने वारिवार्सको नेतृत्व गर्दै आफ्नो टोलीलाई फाइनल पुर्याए पनि उपाधि उचाल्न असफल रहे ।

३. ब्राड हग

अष्ट्रेलियाका बाँया हाते स्पिनर ब्राड हगले ५ सिजन आईपीएल खेलेका छन् । सन् २०१२ मा राजस्थान रोयल्सबाट आईपीएल डेब्यु गरेका उनले सन् २०१४ मा कलकत्ता नाइट राइडर्सबाट खेले ।

सन् २०१६ मा आफ्नो आईपीएल करियर अन्त्य गरेका उनले दुवै टिमबाट आईपीएल उपाधि चुम्न सकेनन् । तर, उनले अष्ट्रेलियाबाट विश्वकप उपाधि भने उचालेका छन् ।

सन् २००७ को विश्वकप अष्ट्रेलियाले जित्दा हग टिममा रहेका थिए ।

४. शन टैट

सन् २००७ मा अष्ट्रेलियाले विश्वकप जित्दा शन टैट मुख्य खेलाडी रहेका थिए । उक्त विश्वकपमा टैटले २३ विकेट हात पार्दै दोस्रो सर्वाधिक विकेट लिने खेलाडी बनेका थिए । तर, टैटले आईपीएल उपाधि भने जित्न सकेनन् ।

टैटले सन् २००९ देखि २०१३ सम्म राजस्थान रोयल्सबाट आईपीएल खेलेका थिए । यस्तै सन् २०१४ र २०१५ मा कुनै टिमले उनलाई अनुबन्ध गरेन । सन् २०१६ मा कलकत्ता नाइट राइडर्सबाट आईपीएल खेलेका उनले औषत प्रदर्शन गरेका थिए ।

५. ब्राड हज

७ बर्षे आईपीएल करियरमा ३ फरक टोलीबाट खेलेका ब्राड हजले उपाधि भने उचाल्न सकेनन् । तर, हजले विश्वकप भने उचाल्न सफल भए ।

अष्ट्रेलियाले सन् २००७ को विश्वकप जित्दा हज टोलीमा रहेका थिए ।

६. वीरेन्द्र सहवाग

सन् २०११ को विश्वकपमा उत्कृष्ट इनिङ्स खेल्दै सहवागले आफुलाई विश्वको उत्कृष्ट ओपनरमा उभ्याएका थिए । भारतले सन् २०११ को विश्वकप जित्नुमा सहवागको भूमिका महत्वपूर्ण रहेको थियो ।

तर, आईपीएलको करियरमा भने उनले उपाधि उचाल्ने शौभाग्य पाएनन् ।

सन् २००८ मा दिल्ली डेयरडेभिल्सबाट आईपीएल खेल्न थालेका उनले सन् २०१४ मा किंग्स इलाभेन पन्जाबबाट फाइनल खेलेका थिए । तर, उपाधि उचाल्ने उनको सपना पुरा भएन ।

त्यसपछि सहवागले सन् २०१५ मा खेल जीवनबाट सन्यास लिएका थिए ।