स्ट्राइकर सालाको तस्विर ट्वीट गर्ने पक्राउ

एजेन्सी । विमान दुर्घटनामा निधन भएका कार्डिफ सिटीका फरवार्ड इमिलियानो सालाको तस्विर सामाजिक संजाल ट्वीटरमा पोष्ट गर्ने दुई व्यक्ति पक्राउ परेका छन् ।

इंग्ल्यान्डका प्रहरीले पोस्टमार्टमका लागि खिचिएको सालाको मृत शरीर ट्वीटरमा पोष्ट गरेको भन्दै एक महिला र एक पुरुषलाई पक्राउ गरेको जनाएको छ । पक्राउ पर्ने ४८ बर्षीय महिला र ६२ बर्षीय पुरुषको पहिचान भने प्रहरीले खुलाएको छैन ।

प्रहरीले पोस्टमार्टमका लागि खिचिएको तस्बिर अनाधिकृत रुपमा कम्प्युटरबाट चोरी गर्दै सामाजिक संजालमा पोष्ट गरेको भन्दै विल्टशायरबाट दुई व्यक्तिलाई पक्राउ गरेको हो।

अर्जेन्टिनाका २८ बर्षीय स्ट्राइकर सालाको गत जनवरीमा विमान दुर्घटनामा निधन भएको थियो ।

साला फ्रेन्च क्लब नान्टेसबाट प्रिमियर लिग क्लब कार्डिफ सिटीमा महँगो मुल्यमा सरुवा भएका थिए । तर, कार्डिफतर्फ जाँदै गर्दा गत जनवरी २१ मा प्लेन दुर्घटना परेर सालाको निधन भएको थियो ।

साला चढेको विमान समुन्द्रमुनि दुर्घटना ग्रस्त अवस्थामा च्यानल आइसल्याण्डमा दुई सातापछि भेटिएको थियो ।