काठमाडौं । दक्षिण एसियाली महिला फुटबल प्रतियोगिता साफ च्याम्पियनसिप खेलेको टिमले ओलम्पिक छनोटको दोस्रो चरण समेत खेल्ने भएको छ । अखिल नेपाल फुटबल संघ एन्फाले विराटनगरमा भएको साफ च्याम्पियनसिप खेलेकाे टिमलाईनै टोकियो ओलम्पिकको दोस्रो चरणको छनोट खेल्न पठाउने भएको हो ।
एन्फाले साफ च्याम्पियनसिप सकिने बित्तिकै खेलाडीलाई आराम दिएको थियो । गत बुधबारबाट मात्र राष्ट्रिय टिमका खेलाडीले अभ्यास सुरु गरेका थिए ।
महिला टिम छोटो तयारी गरेर ओलम्पिक छनोटको दोस्रो चरण खेल्न जान लागेको हो । मुख्य प्रशिक्षक हरी खड्काले ओलम्पिक छनोटको तयारीका लागि खेलाडीलाई चार दिन मात्र अभ्यास गराएका छन् ।
‘खेलाडीहरु निरन्तर खेलिरहेका छन् । साफ लगत्तै दुई दिन खेलाडीलाई आराम दिएका थियौ । तर खेलाडी व्यस्त छन् ।’ मुख्य प्रशिक्षक खड्काले खेलपाटीसंग भने, ‘कमजोर स्थानमा यु–१९ बाट केही खेलाडी ल्याउने योजना थियो । तर साफकै टिमलाई लिएर ओलम्पिक छनोट खेल्नेछौ ।’
‘ठुला खेल नभएपनि उमेर समुह लगायत विभिन्न टिमसंग खेलाएर टिमको कमजोरी पत्ता लगाउने कोशिश गरेको छु ।’ उनले थपे ।
मुख्य प्रशिक्षक खड्काले नेपाली टिमको लक्ष्य अघिल्लो चरण प्रवेश गर्नेनै रहेको उल्लेख गरे ।
‘हरेक प्रशिक्षकको लक्ष्य सफल हुनुनै हुनेछ । टिम अनुसारको रणनीति बनेको छ । म्यानमार, भारत र ईन्डोनेसियालाई फरक फरक रणनीति अनुसार खेलेर समुह चरण पार गर्ने लक्ष्य हो ।’ उनले भने ।
ओलम्पिकको पहिलो चरणको खेलमा नेपालले भारत र आयोजक म्यानमारसंग समान १–१ गोलको बराबरी खेल्दै दोस्रो चरणमा प्रवेश गरेको थियो ।
दोस्रो चरणको छनोट प्रतियोगितामा नेपाल समुह बी मा रहेको छ । नेपाल सम्मिलित समुहमा आयोजक म्यानमार सहित भारत र इन्डोनेशिया छन् ।
नेपालले आफ्नो पहिलो खेलमा आयोजक म्यानमार, दोस्रो खेलमा भारत र अन्तिम खेलमा इन्डोनेशियाको सामना गर्नेछ ।
समुहको शीर्ष स्थानमा रहने टिम अघिल्लो चरण प्रवेश गर्नेछ ।
महिला टिमकाे नामावली :
गोलकिपर : एन्जिला तेम्वाप्पो सुब्वा, अन्जना राना मगर, उषा नाथ ।
डिफेन्डर : हिरा कुमारी भुजेल, गिता राना, पुनम जर्गा मगर, अमृता जैशी, कविता धिमाल, पुजा राना, मन माया लिम्वु ।
मिडफिल्डर : अनिता बस्नेत, दिपा राई, मन्जली योञ्जन, सर्मिला थापा, सुरु लिम्बु, रेनुका नगरकोटी, अनिता के सी ।
स्ट्राइकर : रेखा पौडेल, निरु थापा कप्तान, सावित्रा भण्डारी, ।
