च्याम्पियन्स लिग क्वार्टरफाइनलअघि भिड्दै बार्सिलोना र एट्लेटिको

काठमाडौं। बार्सिलोना र एट्लेटिको मड्रिडबीच यस साता ला लिगाअन्तर्गत महत्त्वपूर्ण खेल हुँदैछ। यसलाई युईएफए च्याम्पियन्स लिग क्वार्टरफाइनलअघि हुने पूर्वाभ्यासका रूपमा हेरिएको छ।

यो खेल १० दिनभित्र यी दुई टोलीबीच हुने तीन भेटमध्ये पहिलो हुनेछ। दुई स्पेनी प्रतिद्वन्द्वी दुई महिनाभित्र पाँच पटक आमनेसामने हुनेछन्।

यी दुईले फेब्रुअरी र मार्चमा कोपा डेल रे सेमिफाइनलमा पनि प्रतिस्पर्धा गरेका थिए। उक्त खेलमा एट्लेटिकोले समग्रमा ४–३ ले जित्दै फाइनलमा स्थान बनाएको थियो।

च्याम्पियन्स लिगका खेल बार्सिलोनामा बुधबार र अप्रिल १४ मा मड्रिडमा हुनेछन्। बार्सिलोना लगातार दोस्रो सिजन सेमिफाइनल पुग्ने लक्ष्यमा छ भने एट्लेटिको २०१७ पछि पहिलो पटक अन्तिम चारमा फर्किन चाहन्छ।

शनिबारको लिग खेलमा बार्सिलोना शीर्षस्थानमा रियल मड्रिडभन्दा कम्तीमा चार अंकको अग्रता कायम राख्न चाहन्छ। एट्लेटिको भने बार्सिलोनाभन्दा १६ अंकले पछि रहे पनि तेस्रो स्थानमा फर्किन चाहन्छ। टोली भिल्लारियल भन्दा एक अंकले पछि छ।

यसअघि शनिबार नै रियलले रेलिगेसनको खतरामा रहेको मायोर्कासँग खेल्नेछ। अन्तर्राष्ट्रिय ब्रेकअघि भएको पछिल्लो खेलमा रियलले एट्लेटिकोलाई ३–२ ले हराएको थियो।