सुपर ८ को पहिलो खेलमा न्युजिल्यान्ड र पाकिस्तान भिड्ने

काठमाडौं। टी–२० विश्वकपअन्तर्गत सुपर ८ चरणको खेल तालिका सार्वजनिक भएको छ।

यस चरणको पहिलो खेल फेब्रुअरी २१ मा कोलम्बोमा न्युजिल्यान्ड र पाकिस्तानबीच हुनेछ। प्रतियोगितामा भारत र श्रीलंकासहित इङ्ल्यान्ड, दक्षिण अफ्रिका, वेस्ट इन्डिज, जिम्बाब्वे र न्युजिल्यान्ड तथा पाकिस्तानले उपाधिका लागि प्रतिस्पर्धा गर्नेछन्।

सुपर ८ चरणका खेलहरू फेब्रुअरी २१ देखि मार्च १ सम्म भारत र श्रीलंकाका विभिन्न सहरमा सञ्चालन हुनेछन्। दोस्रो दिन श्रीलंका र इङ्ल्यान्ड क्यान्डीमा आमनेसामने हुँदा भारतले अहमदाबादमा दक्षिण अफ्रिकाको सामना गर्नेछ।

त्यसपछि जिम्बाब्वे र वेस्ट इन्डिजबीच मुम्बईमा प्रतिस्पर्धा हुनेछ भने इङ्ल्यान्ड–पाकिस्तान, श्रीलंका–न्युजिल्यान्ड, वेस्ट इन्डिज–दक्षिण अफ्रिका र भारत–जिम्बाब्वेबीचका खेलहरू क्रमशः क्यान्डी, कोलम्बो, अहमदाबाद र चेन्नईमा आयोजना हुनेछन्।

फेब्रुअरी २७ मा इङ्ल्यान्ड र न्युजिल्यान्ड कोलम्बोमा भिड्दा २८ फेब्रुअरीमा श्रीलंका र पाकिस्तान क्यान्डीमा खेल्नेछन्। सुपर ८ चरणको अन्तिम दिन मार्च १ मा जिम्बाब्वे र दक्षिण अफ्रिका दिल्लीमा तथा भारत र वेस्ट इन्डिज कोलकातामा आमनेसामने हुनेछन्।

सेमिफाइनल मार्च ४ र ५ मा तथा फाइनल मार्च ८ मा हुने तालिका छ।