नेपाललाई स्कटल्यान्डको दोस्रो ठूलो लक्ष्य

काठमाडौं। स्कटल्यान्डले टी–२० विश्वकपमा नेपाललाई १७१ रनको चुनौतीपूर्ण लक्ष्य दिएको छ।

पहिले ब्याटिङ गरेको स्कटल्यान्डले निर्धारित २० ओभरमा ७ विकेट गुमाउँदै १७० रन बनाएको हो। यो स्कटल्यान्डले दिएको दोस्रो ठूलो लक्ष्य हो।

गत वर्ष घरेलु मैदानमा भएको त्रिदेशीय सिरिजमा स्कटल्यान्डले १९४ रनको लक्ष्य दिएको थियो। उक्त खेलमा नेपाल ३४ रनले पराजित भएको थियो।

यसपल्ट स्कटल्यान्डका माइकल जोन्सले सर्वाधिक ७१ रनको योगदान दिए। ४५ बल खेलेका उनले ८ चौका र ३ छक्का प्रहार गरे। जर्ज मुन्सेले २७, ब्रान्डन म्याकमुलन २५ रन तथा कप्तान रिची बेरिङ्टनले १० रन जोडे। अन्त्यतिर मार्क वाट १० रनमा अविजित रहे।

नेपालका सोमपाल कामी सर्वाधिक सफल रहे। उनले ४ ओभरमा २५ रन खर्चेर ३ विकेट लिए। नन्दन यादवले २ विकेट हात पारे भने रोहित पौडेल र कुशल भुर्तेलले समान १–१ विकेट लिए। दीपेन्द्रसिंह ऐरी र सन्दीप लामिछाने भने विकेटविहीन रहे।

‍