समराले रचेको इतिहास व्यर्थ

काठमाडौं। आईसीसी टी–२० विश्वकपअन्तर्गत चेन्नईमा भएको खेलमा न्युजिल्यान्डले क्यानडालाई आठ विकेटले पराजित गर्दै सुपर ८ चरणमा स्थान सुरक्षित गरेको छ।

क्यानडाका युवा ब्याटर युवराज सामराको कीर्तिमानी शतक व्यर्थ जाँदा न्युजिल्यान्ड सहज जित निकाल्न सफल भयो।

पहिले ब्याटिङ गरेको क्यानडाले ४ विकेट गुमाएर १७३ रनको प्रतिस्पर्धात्मक स्कोर बनाएको थियो। १९ वर्ष १४१ दिनका युवराज सामराले ६५ बलमा ११० रनको विस्फोटक इनिङ्स खेले।

यो प्रतियोगिताको इतिहासमा कुनै एसोसिएट टोलीका ब्याटरले पूर्ण सदस्य राष्ट्रविरुद्ध बनाएको सबैभन्दा ठूलो व्यक्तिगत स्कोर हो। साथै, उनी पुरुष टी–२० विश्वकप खेलमा अर्धशतक पार गर्ने सबैभन्दा कम उमेरका खेलाडी पनि बने।

तर, क्यानडाका बलर र फिल्डरले अपेक्षाअनुसार प्रदर्शन गर्न सकेनन्। न्युजिल्यान्डका टिम सिफर्ट र फिन एलेनलाई पहिलो चार ओभरमै आउट गरे पनि त्यसपछि ग्लेन फिलिप्स र रचिन रविन्द्रले खेल आफ्नो पक्षमा मोडिदिए।

ग्लेन फिलिप्सले ३६ बलमा अविजित ७६ रन बनाए भने रचिन रविन्द्रले ३९ बलमा अविजित ५९ रन जोडे। दुवैले तेस्रो विकेटका लागि मात्र ७३ बलमा १४६ रनको साझेदारी गर्दै टोलीलाई ४.५ ओभर बाँकी छँदै जित दिलाए।

न्युजिल्यान्डका प्रमुख बलर लोकी फर्गुसन (पहिलो सन्तानको जन्मका कारण स्वदेश फर्किएका) र मिचेल स्यान्टनर (खानपान समस्याका कारण अनुपस्थित) बिना मैदान उत्रिएको टोलीको बलिङ आक्रमण कमजोर देखिएको थियो, जसको फाइदा सामराले खुलेर उठाए। उनले जेम्स नीशाम र कोल म्याकन्कीमाथि लगातार आक्रामक प्रहार गर्दै ३६ बलमा अर्धशतक पूरा गरे।

दिलप्रीत बाजवासँग पहिलो विकेटका लागि १४ ओभरमा ११६ रनको साझेदारी गरेका सामराले ५८ बलमा शतक पूरा गरे। १०३ रनमा उनी जीवनदान पाएका थिए, जब जेम्स नीशामले म्याट हेनरीको बलमा ‘लङ अन’ मा सजिलो क्याच छोडे। अन्ततः अन्तिम ओभरमा ग्लेन फिलिप्सले ‘डिप ब्याकवर्ड स्क्वायर लेग’मा दोस्रो प्रयासमा क्याच लिँदा सामराको सानदार इनिङ्स समाप्त भयो।

सामराको ऐतिहासिक शतकले क्यानडालाई बलियो स्थितिमा पुर्‍याए पनि फिलिप्स–रविन्द्र जोडीले उत्कृष्ट जवाफी प्रदर्शन गर्दै न्युजिल्यान्डलाई महत्वपूर्ण जित दिलायो।