सबैभन्दा कम उमेरमा शतक बनाउने खेलाडीको सूचीमा युवराज

काठमाडौं। पुरुष विश्वकप (ओडीआई र टी–२०) मा सबैभन्दा कम उमेरमा शतक प्रहार गर्ने ब्याटरहरूको सूचीमा नयाँ नाम थपिएको छ।

क्यानडाका युवा खेलाडी युवराज समराले मंगलबार न्युजिल्यान्डविरुद्ध १९ वर्ष १४ दिनको उमेरमा शतक बनाउँदै ऐतिहासिक कीर्तिमान कायम गरेका छन्।

न्युजिल्यान्डविरुद्ध बनाएको शतकले उनलाई विश्वकप इतिहासकै सबैभन्दा कम उमेरमा १०० रन बनाउने खेलाडी बनाएको हो।

उनले ५८ बलमा १० चौका र ६ छक्कासहित यो कीर्तिमान कायम गरेका हुन्। यसअघि यो कीर्तिमान आयरल्यान्डका पल स्टर्लिङको नाममा थियो। उनले १९ वर्ष १४ दिनकै उमेरमा सन् २०११ मा नेदरल्यान्ड्सविरुद्ध शतक प्रहार गरेका थिए।

उमेर समान भए पनि समराले पछिल्लो संस्करणमा उपलब्धि दोहोर्‍याउँदै सूचीको शीर्ष स्थान सेयर गरेका छन्।

त्यसैगरी तेस्रो स्थानमा अष्ट्रेलियाका पूर्व कप्तान रिकी पोन्टिङ छन्। उनले २१ वर्ष ७६ दिनको उमेरमा सन् १९९६ मा वेस्टइन्डिजविरुद्ध विश्वकपमा शतक बनाएका थिए।