नेपालको प्रभावशाली जित

काठमाडौं। आईसीसी पुरुष टी–२० विश्वकपको तयारीका क्रममा श्रीलंका भ्रमणमा रहेको नेपाली राष्ट्रिय पुरुष क्रिकेट टोलीले अन्तिम अभ्यास खेलमा प्रभावशाली जित हात पारेको छ।

नेपालले श्रीलंका ‘ए’ टोलीलाई ७ विकेटले पराजित गर्दै अभ्यास खेलहरू सुखद रूपमा टुंग्याएको हो। यसअघि खेलेका दुवै अभ्यास खेलमा पराजित भएको नेपालले अन्तिम खेलमा उत्कृष्ट प्रदर्शन गर्दै आत्मविश्वासपूर्ण जित निकालेको हो।

श्रीलंका ‘ए’ ले दिएको १३३ रनको लक्ष्य नेपालले १६.२ ओभरमै ३ विकेट गुमाउँदै पूरा गर्‍यो। नेपालको जितमा कुशल मल्लले महत्वपूर्ण भूमिका निभाए। उनले ३५ बल खेल्दै ४९ रनको आकर्षक इनिङ खेले।

उपकप्तान दीपेन्द्र सिंह ऐरीले अन्तिममा विजयी चौका प्रहार गर्दै १५ बलमा २२ रन बनाइ अविजित रहे। त्यस्तै, आरिफ शेखले २२ बलमा २४ रन जोडे भने कप्तान रोहितकुमार पौडेलले १९ रनको योगदान दिए। ओपनर आशिफ शेख ११ रनमा आउट भए।