अल्मुताइरीले श्रीलंकाली टोली छाडे
काठमाडौं। नेपाली राष्ट्रिय टोलीका पूर्वमुख्य प्रशिक्षक अब्दुल्लाह अल्मुताइरीले श्रीलंका छाडेका छन्। उनी श्रीलंकाली फुटबल टोलीका मुख्य प्रशिक्षक थिए।
उनले बिहीबार आपसी सहमतिमा टोली छाडेका हुन्। यससँगै श्रीलंकाली फुटबलको एउटा सम्झनलायक अध्याय टुंगिएको छ। उनी श्रीलंका जानुअघि श्रीलंकाले पछिल्ला १० वर्षमा जम्मा ४ खेल जितेको थियो। तर, उनले टोली सम्हालेपछि १२ खेलमै ५ जित दिलाइदिएका थिए।
उनको कार्यकालका दौरान राष्ट्रिय टोलीको संरचना सुदृढ बनाउने, क्षेत्रीय तथा अन्तर्राष्ट्रिय स्तरमा प्रदर्शन सुधार गर्ने, उच्च स्तरका प्रतिद्वन्द्वीहरूसँग प्रतिस्पर्धात्मक खेल प्रस्तुत गर्ने जस्ता महत्वपूर्ण उपलब्धिहरू हासिल भए। साथै, राष्ट्रिय टोलीमा आत्मविश्वास, अनुशासन र स्पष्ट पहिचान पुनःस्थापित गर्न उनले उल्लेखनीय योगदान पुर्याए।
आफ्नो विदाइ सन्देशमा उनले समर्थक, खेलाडी, प्रशिक्षक टोली र फुटबल महासंघप्रति आभार व्यक्त गर्दै श्रीलंका फुटबल महासंघका अध्यक्षप्रति विशेष धन्यवाद प्रकट गरेका छन्।
