पेरिस एफसीसँग हार्दै फ्रेन्च कपबाट बाहिरियो पीएसजी

काठमाडौं। पेरिस एफसीले फ्रेन्च कप (कूप दे फ्रान्स) मा ऐतिहासिक सफलता हासिल गर्दै धनी र चर्चित छिमेकी पेरिस सेन्ट–जर्मेन (पीएसजी) लाई पराजित गरेको छ।

सोमबार भएको खेलमा पेरिस एफसीले पीएसजीविरुद्ध पहिलोपटक जित दर्ता गर्दै प्रतियोगिताबाट बाहिर्याएको हो।

कूप दे फ्रान्सको कीर्तिमानी १६ पटकको विजेता पीएसजी सन् २०१२–१३ सिजनपछि पहिलो पटक अन्तिम ३२ मा पुग्न असफल भयो। घरेलु मैदानमा खेलिएको खेलमा पीएसजीले पूरै खेल नियन्त्रणमा राखे पनि अवसरलाई गोलमा बदल्न सकेन।

खेलको ७४औं मिनेटमा पेरिस एफसीले गरेको एक मात्र गोल निर्णायक बन्यो। काउन्टर आक्रमणमा पूर्व पीएसजी विंगर जोनाथन इकोनेले बल जाली चुमाउँदै आफ्नो टोलीलाई अग्रता दिलाए। इकोनेले यसअघि पाँचौं चरणमा युएस राओन–ल’एटापेविरुद्धको खेलमा ह्याट्रिक गरेका थिए।

पीएसजीको युथ एकेडेमीबाट हुर्किएका इकोनेले २०१६–१७ सिजनमा पीएसजीका लागि सात खेल खेलेका थिए। त्यसपछि उनले लिल्ले र फियोरेन्टिनामा लामो समय बिताए।

खेलमा पीएसजीले ७० प्रतिशत बल नियन्त्रणमा राख्दै २५ प्रहार गरेको थियो भने पेरिस एफसीले मात्र चार प्रहार गरेको थियो। तर, पेरिस एफसीका गोलकिपर ओबेद नकम्बादियोले उत्कृष्ट प्रदर्शन गर्दै पीएसजीका निरन्तर आक्रमणलाई रोक्न सफल भए।