बिरेन चम्किँदा आँगनको सानदार जित

हिमालयन मनोज, धनगढी। बिरेन बमले ५ विकेट लिएसँगै आँगन केक्स एन्ड डेरीले नवौं लिटिल फ्लावर प्राइड लिगमा विजयी सुरुआत गरेको छ।

आइतबार सम्पन्न खेलमा आँगनले आयोजक लिटिल फ्लावर स्पोर्ट्सलाई ७ विकेटले पराजित गरेको हो। जितसँगै आँगनले समूह ‘डी’ मा २ अंक जोडेको छ।

लिटिल फ्लावरले दिएको ४८ रनको सामान्य लक्ष्य पछ्याएको आँगनले ५.३ ओभरमा ३ विकेट गुमाउँदै ५० रन बनायो।

आँसनका ओपनर सुमित बुडालले सर्वाधिक २४ रन बनाए। अविजित रहेका उनले ११ बलमा १ चौका र ३ छक्का प्रहार गरे।

बसन्त भट्ट १७ रनमा आउट हुँदा विशाल ऐर २ रनमा अविजित रहे। लिटिल फ्लावरका विराज विष्टले २ र अनिल रावतले १ विकेट लिए।

त्यसअघि फाफ्ला क्रिकेट मैदानमा टस हारेर पहिला ब्याटिङ थालेको लिटिल फ्लावरले ९.३ ओभरमा सबै विकेट गुमाउँदै ४७ रन बनाएको थियो।

लिटिल फ्लावरका दिलबहादुर बोहराबाहेक अन्यले दोहोरो अंकमा रन बटुल्न सकेनन्। १४ बल खेलेका उनले १ चौका र २ छक्कासहित २२ रन बनाए।

आँगनका बिरेनले सर्वाधिक ५ विकेट लिए। ३ ओभर बलिङ गरेका उनले ६ रन खर्चिए।

किरण चन्द र राहुल भण्डारीको नाममा समान २ विकेट रहँदा निरञ्जन गौतमले १ विकेट राखे।