१८ महिनापछि बार्सिलोनामा फर्किंदै कान्सेलो

काठमाडौं। १८ महिनापछि बार्सिलोनाले पुनः जोआओ कान्सेलोलाई टोलीमा भित्र्याउने सम्झौता टुंग्याएको छ।

यद्यपि, क्लबले अहिलेसम्म औपचारिक घोषणा गरेको छैन। पोर्चुगलका फुलब्याक कान्सेलो साउदी अरेबियाको क्लब अल हिलालबाट ऋण (लोन) मा क्याटलान क्लबमा फर्किन लागेका हुन्।

३१ वर्षीय कान्सेलोले २०२३–२४ सिजनमा एक वर्षका लागि ऋणमा बार्सिलोनाबाट खेलेका थिए। त्यसपछि उनी आफ्ना पूर्वक्लब म्यानचेस्टर सिटीमा फर्किए। सोही समरमा उनी फेरि बार्सिलोना फर्किन इच्छुक रहेको चर्चा चले पनि आर्थिक संकटका कारण क्लबले अन्य विकल्प रोज्यो।

त्यसपछि कान्सेलो २५ मिलियन युरोमा अल हिलाल पुगेका थिए। स्पेनी सञ्चारमाध्यम मुन्डो डेपोर्टिभो र पत्रकार माटेओ मोरेत्तोसहित विभिन्न स्रोतले बार्सिलोना, अल हिलाल र खेलाडीबीच सहमति भइसकेको पुष्टि गरेका छन्।

डिफेन्डर आन्द्रेयास क्रिस्टेन्सेन अप्रिलसम्म चोटका कारण मैदान बाहिर रहने भएपछि जनवरी ट्रान्सफर विन्डोमा टोली बलियो बनाउने योजनामा थियो बार्सिलोना।

ला लिगाको नियमअनुसार दीर्घकालीन चोट लागेका खेलाडीको तलब सीमाको ८० प्रतिशतसम्म प्रयोग गरी नयाँ खेलाडी दर्ता गर्न सकिन्छ। मोरेत्तोका अनुसार यो रकम करिब ५ मिलियन युरो हुन्छ, जसबाट कान्सेलोको ७.५ मिलियन युरो वार्षिक तलबको दोस्रो भागको दुई तिहाइ तिरिनेछ।

स्पेनी सुपर कपपछि साउदी अरेबियाबाट फर्किएलगत्तै कान्सेलो बार्सिलोनाका लागि खेल्न योग्य हुनेछन्। यससँगै जर्मन प्रशिक्षक हान्सी फ्लिकका लागि कान्सेलो सम्भवतः एकमात्र नयाँ अनुबन्ध बन्नेछन्। सुरुमा फ्लिकले उनलाई टोलीमा भित्र्याउने पक्षमा नरहे पनि उनी एक सेन्टर डिफेन्डर चाहन्थे। तर अन्ततः उनले यस सम्झौतामा हरियो संकेत दिएका छन्।

कान्सेलोको आगमनसँगै फुलब्याक पोजिसनमा जुल्स कुन्डे र आलेहाण्ड्रो बाल्देका लागि थप विकल्प उपलब्ध हुनेछ। आवश्यक परे कुन्डेलाई सेन्ट्रल डिफेन्समा पनि प्रयोग गर्न सकिनेछ।

साथै मिडफिल्डबाट पछाडि झर्ने विकल्पका रूपमा एरिक गार्सिया छन्। तर सिजनको दोस्रो चरणमा सेन्ट्रल डिफेन्सका दुई स्थानका लागि जेरार्ड मार्टिन, पाउ कुबार्सी र रोनाल्ड अराउहो प्रशिक्षक फ्लिकका मुख्य रोजाइ रहने अपेक्षा गरिएको छ।