लिग च्याम्पियन चर्च बोइजलाई हराउँदै लाङ्दीदेवी फाइनलमा

हिमालयन मनोज, लमजुङ। ‘ए’ डिभिजन लिग च्याम्पियन चर्च बोइज युनाइटेडलाई सहजै पराजित गर्दै नाल्माको लाङ्दीदेवी एफसी ३३औं त्रिवेणी कपको फाइनलमा पुगेको छ।

बेसिसहरस्थित त्रिवेणी रंगशालामा आइतबार सम्पन्न दोस्रो सेमिफाइनलमा लाङ्दीदेवीले २–० को जित निकालेको हो। योसँगै लाङ्दीदेवीले उपाधिका लागि साबिक विजेता एपीएफ क्लबसँग खेल्ने भएको छ।

एपीएफले पहिलो सेमिफाइनलमा लमजुङ मर्स्याङ्दीलाई टाइब्रेकरमा ४–३ ले पराजित गर्दै लगातार फाइनलमा स्थान सुरक्षित गरिसकेको छ।

लाङ्दीदेवीलाई जित दिलाउन रोहन कार्की र आशिष गुरुङले समान एक गोल गरे। खेलको ३६औं मिनेटमै रोहनले लाङ्दीदेवीलाई सुरुआती अग्रता दिलाएका थिए।

दोस्रो हाफको इन्जुरी समयको पहिलो मिनेटमा आशिषले गोल गर्दै लाङ्दीदेवीको सहज जित पक्का गरे।