फिक्का लिभरपुल

काठमाडौं। लिभरपुलले लगातार आठ खेलसम्मको अपराजित यात्रा कायम राखे पनि पछिल्ला खेलहरूमा टोलीको प्रदर्शन अपेक्षाअनुसार प्रभावशाली देखिएको छैन। आक्रमणतर्फका मुख्य खेलाडीहरूको अनुपस्थितिले टोलीलाई असर पारेको छ।

एनफिल्डमा भएको खेलमा लिभरपुलका लागि पहिलो हाफमा हुगो एकितिकेले गोलपोस्ट अगाडिबाट हेडर हानेका थिए। त्यो नै सबैभन्दा स्पष्ट गोलको अवसर रह्यो, तर त्यो लक्ष्यमा जान सकेन। अलेक्जान्डर इसाक चोटका कारण बाहिर रहँदा तथा मोहम्मद सलाह अफ्रिका कप अफ नेशन्स खेल्न गएकाले आक्रमणमा लिभरपुल निरिह देखियो।

यो नतिजापछि लिभरपुल तालिकाको चौथो स्थानमा यथावत् रहेको छ। शीर्ष स्थानको आर्सनल भने १२ अंकले अगाडि छ। यसले लिभरपुलको उपाधि रक्षा यात्रा निराशाजनक बन्दै गएको संकेत गर्छ।

नोभेम्बर २६ मा च्याम्पियन्स लिगमा पीएसभी आइन्डहोभेनसँग घरेलु मैदानमा ४–१ ले पराजित भएपछि लिभरपुलले प्रिमियर लिगमा सात खेल खेलेको छ। तीमध्ये चारमा जित र तीन खेल बराबरीमा सकिएको छ। यद्यपि, टोलीको खेलमा अझै समन्वय र प्रवाहको कमी देखिएको छ।

प्रशिक्षक आर्ने स्लटले सिजनको सुरुआती कमजोर डिफेन्सलाई ध्यानमा राख्दै पछिल्ला खेलहरूमा रक्षात्मक मजबुतीमा बढी जोड दिएको बताए। खेलपछि उनले भने,‘यस सिजन यस्ता खेलमा हामीले धेरैपटक गोल खाएका छौं। आज गोल नखानु सकारात्मक कुरा हो।’

लिभरपुलको हालको अपराजित यात्रामा च्याम्पियन्स लिगअन्तर्गत इन्टर मिलानविरुद्धको अवे जित पनि समावेश छ।