मुम्बई सिटीबाट लगानी फिर्ता लिँदै म्यानचेस्टर सिटी ग्रुप

काठमाडौं। नोभेम्बर २०१९ मा सिटी फुटबल ग्रुप (सीएफजी)ले भारतीय फुटबल क्लब मुम्बई सिटीमा लगानी गर्‍यो। त्यतिबेला भारतीय फुटबलको अनुहार धेरै छोटो समयमा परिवर्तन हुने अपेक्षा गरिएको थियो।

तर, पाँच वर्ष भित्र त्यो परिदृश्य परिवर्तन भएको छ। म्यानचेस्टर सिटीको स्वामिक्त रहेको सीएफजीले पाँच वर्षपछि आफ्नो सम्पूर्ण सेयर फिर्ता लिएको छ।

सिएफजीले क्लबका पुराना मालिक तथा बलिउड अभिनेता रणबीर कपूर र व्यवसायी विमल पारेखलाई सबै सेयर हस्तान्तरण गरेको हो।

सिएफजीको स्वामित्वमा रहँदा मुम्बई सिटीले दुई पटक इन्डियन सुपर लिग (आईएसएल) शिल्ड र दुई पटक आईएसएल कप जित्न सफल भएको थियो। तर, मैदानबाहिरका प्रशासनिक जटिलताले ती उपलब्धिहरू ओझेलमा परे।

सिएफजीले मुख्यतः इन्डियन सुपर लिग (आईएसएल) को अस्थिर अवस्थालाई कारण देखाउँदै भारतबाट आफ्नो लगानी फिर्ता लिने निर्णय गरेको जनाएको छ।

एक विज्ञप्तिमा भनिएको छ, ‘व्यावसायिक समीक्षा गर्दा आईएसएलको भविष्य अनिश्चित देखिएको छ र आगामी सिजन कहिले सुरु हुन्छ भन्ने विषयमै स्पष्टता छैन। दीर्घकालीन योजनामा विश्वास गर्ने सिएफजी यस्तो अनिश्चित लिगमा थप लगानी गर्न इच्छुक छैन।’

उल्लेखनीय छ, २०२५–२६ सिजनको आईएसएल गत सेप्टेम्बरमै सुरु हुने अपेक्षा गरिएको थियो। तर, अखिल भारतीय फुटबल महासंघ (एआईएफए) र व्यावसायिक साझेदार फुटबल स्पोर्ट्स डेभल्पमेन्ट लिमिटेड (एफएसडीएल)बीचको विवादका कारण लिग रोकिएको छ।

सर्वोच्च अदालतको अनुमतिमा नयाँ टेन्डर आह्वान गरिए पनि कुनै पनि कम्पनीले लिग सञ्चालनमा चासो देखाएको छैन। क्लबहरूले आफैं लिग सञ्चालन गर्ने प्रस्तावसमेत गरे पनि एआईएफएफ अध्यक्ष कल्याण चौबे नेतृत्वको समितिले उक्त प्रस्ताव अस्वीकार गरेको छ।

यी सबै कारणले आईएसएल अहिले अनिश्चित अवस्थामा पुगेको छ। यसको प्रत्यक्ष प्रभाव स्वरूप सीएफजीले मुम्बई सिटीबाट आफ्नो यात्रा अन्त्य गरेको हो।