रियल छाडेर लियोन जाने भए एन्ड्रिक

काठमाडौं। रियल मड्रिडका ब्राजिलियन किशोर फरवार्ड एन्ड्रिक सिजनको अन्त्यसम्मका लागि ऋण (लोन) मा फ्रान्सेली क्लब ओलम्पिक लियोनसँग अनुबन्धित भएका छन्।

दुवै क्लबले मंगलबार यसको पुष्टि गरेका हुन्। १९ वर्षीय एन्ड्रिक प्रशिक्षक जाबी आलोन्सोको नेतृत्वमा ला–लिगा क्लब रियल मड्रिडमा पर्याप्त खेल समय पाउन संघर्ष गरिरहेका थिए।

एन्ड्रिकले १८ वर्ष पूरा गरेपछि जुलाई २०२४ मा पाल्मेइरासबाट रियलसँग ६ वर्षको सम्झौता गरेका थिए। उनले रियल भाल्लादोलिडविरुद्ध डेब्यु खेलमै बेन्चबाट चार मिनेट बाँकी रहँदा मैदान प्रवेश गर्दै गोल गरेका थिए।

पछिल्लो सिजन प्रशिक्षक कार्लो एन्सेलोट्टीको समयमा उनी अधिकांश खेलहरू वैकल्पिक खेलाडीमा मैदान प्रवेश गरेका थिए। तर, एन्ड्रिक ३७ खेलमा सात गोल गर्न सफल भएका थिए।

यस सिजन उनले दुई पटक छोटो समयका लागि वैकल्पिक खेलाडीको रूपमा खेल्ने अवसर पाए भने कोपा डेल रेमा एक खेलमा सुरुआत गरेका छन्।

एन्ड्रिकले ब्राजिल राष्ट्रिय टोलीका लागि १४ खेलमा तीन गोल गरेका छन्। हाल ब्राजिल टोलीका प्रशिक्षक पनि एन्सेलोट्टी नै छन्। यद्यपि, अक्टोबर र नोभेम्बरमा भएका पछिल्ला मैत्रीपूर्ण खेलहरूका लागि उनी टोलीमा समावेश हुन सकेनन्।

फ्रान्समा लियोनसँगको यो लोन स्पेलले उनलाई नियमित खेल समय दिलाउने र आउँदो वर्षको विश्वकपका लागि राष्ट्रिय टोलीमा पुनः स्थान बनाउन सहयोग पुग्ने अपेक्षा गरिएको छ।