एन्फाको कार्यसमिति बैठकमा सदस्य संघलाई निषेध !

काठमाडौं। अखिल नेपाल फुटबल संघ (एन्फा) को कार्यसमिति बैठकमा प्रशिक्षक, रेफ्री, खेलाडी र महिला संघलगायतका सदस्यलाई निषेध गरिएको छ। यसअघि भने यस्ता बैठकमा ती सबै संघका प्रतिनिधि नियमित रूपमा सहभागी हुँदै आएका थिए।

एन्फा महासचिव किरण राईका अनुसार यी सबै आमन्त्रित हुन्। तर, बैठकको प्रकृति र आवश्यकताअनुसार कहिले बोलाउने–नबोलाउने अभ्यास विगतदेखि नै रहँदै आएको उनले जिकिर गरे। ‘यसपटक ती संघका सदस्यलाई मात्र होइन, अन्य धेरैलाई पनि हामीले बोलाएका छैनौं,’ राईले खेलपाटीसँग भने।

पछिल्लो समय एन्फा कार्यसिमितिले गरेका निर्णयहरूमा विवाद बढ्दै गइरहेको छ। यही पृष्ठभूमिमा एन्फाले संवेदनशील अजेन्डामा आवाज उठाउने सम्भावना भएका संघका पदाधिकारीलाई निषेध गर्न थालेको हो।

एन्फाको आन्तरिक समन्वय र निर्णय प्रक्रियामा पारदर्शिता तथा सहभागीता घट्दै गएको आरोप खेपिरहेको बेला बैठकमा सदस्य संघलाई नबोलाउने कदमको आलोचना अझ बढ्ने संकेत देखिएको छ।