रोनाल्डोलाई करिअरको १३औं रातो कार्ड
काठमाडौं। विश्वकप छनोटअन्तर्गत पोर्चुगलसँग डब्लिनमा सम्पन्न खेल आयरल्यान्डका लागि ऐतिहासिक बन्यो।
ट्रोय प्यारोटका दुई गोलको मद्दतले २००५ पछि पहिलोपटक आयरल्यान्डले पोर्चुगललाई हराउँदै घरेलु मैदानमा जित हात पारेको हो।
खेलको सुरुआतदेखि नै पोर्चुगलले बलमा कब्जा जमाए पनि गोल गर्न सकेन। १७औं मिनेटमा कर्नरबाट प्यारोटले पहिलो गोल गरे भने हाफ टाइमअघि व्यक्तिगत कौशल देखाउँदै दोस्रो गोल थपे।
दोस्रो हाफमा खेलको गति बढेको बेला पोर्चुगल थप दबाबमा पर्यो। ६१औं मिनेटमा क्रिस्टियानो रोनाल्डोले विपक्षी खेलाडीलाई कुहिनोले हानेपछि सुरुमा रेफ्रीले पहेंलो कार्ड देखाए।
तर, भीएआर समीक्षा पछि त्यो निर्णय रातो कार्डमा बदलियो। करिअरको १३औं रातो कार्ड पाएका रोनाल्डो मैदानबाट बाहिरिँदै गर्दा आयरल्यान्ड समर्थकले व्यंग्य गर्दै हूटिङ गरे र उनले पनि व्यंग्यात्मक ताली र संकेतले प्रतिक्रिया दिए।
१० खेलाडीमै सीमित भएको पोर्चुगलले अन्त्यसम्म प्रयास गरे पनि आयरल्यान्डको मजबुत रक्षात्मक घेरालाई तोड्न सकेन र खेल २–० को नतिजासहित सकियो। हार बावजूद पोर्चुगल समूह ‘एफ’ को शीर्षस्थानमै छ।
