यमलले दुखाई कम गर्ने औषधि खाँदै खेल्ने गरेको पुष्टि

काठमाडौं। रोयल स्पेनिस फुटबल फेडेरेशन र बार्सिलोनाको बीच लामिन यमललाई लिएर तनाव सिर्जना भएको छ। यमलको चोट लुकाएको आरोपमा रोयल स्पेनिस फुटबल फेडेरेशन बार्सिलोनाप्रति असन्तुष्ट भएको हो।

विश्वकप छनोटअन्तर्गत जर्जिया र टर्कीविरुद्धको खेलअघि यमल चोटग्रस्त भएका थिए। तर, बार्सिलोनाले समयमै राष्ट्रिय टोलीलाई जानकारी गराएको थिएन। स्वास्थ्यको अवस्थालाई ध्यानमा राखेर स्पेनका प्रशिक्षक लुइस डेला फुएन्टेले उनलाई टोलीबाट फिर्ता पठाएका छन्।

तर, क्याटलान क्लबको गैर-पेशागत व्यवहारले प्रशिक्षकलाई आश्चर्यचकित र निराश बनाएको छ। उनले भविष्यमा यस्ता घटना दोहोरिन नपरोस् भनी चेतावनी दिएका छन्। यमल युवा भए पनि स्पेन र बार्सिलोनाको मुख्य खेलाडी हुन्। त्यसैले उनलाई लिएर बार्सिलोना र राष्ट्रिय टोलीबीच बारम्बार तनाव उत्पन्न हुँदै आएको छ।

गत अक्टोबरमा पनि विश्वकप छनोटका दुई खेलका लागि टोलीमा राखिए पनि खेल्न पाएका थिएनन्। त्यतिबेला ह्यान्सी फ्लिकले यमललाई दुखाइ कम गर्ने औषधि दिएर खेलाएको आरोप लगाएका थिए। यस कारण बार्सिलोनाले केही महत्त्वपूर्ण खेल यमलबिनै खेल्नु परेको थियो।

यसपटक पनि यस्तै घटना दोहोरिएको छ। बार्सिलोनाले केही प्रशासनिक प्रक्रिया गर्दा स्पेनको फुटबल फेडेरेशनलाई जानकारी गराएको थिएन। त्यसपछि उनी चोटग्रस्त भएको पुष्टि भयो। उनलाई ७–१० दिनको विश्राम आवश्यक देखिएको छ।

फुएन्टेले भने,‘ला लिगाको च्याम्पियन र विश्वका उत्कृष्ट क्लबमध्ये एउटा क्लब बार्सिलोना हो। यो क्लबबाट यस्तो व्यवहार अपेक्षित थिएन। यमलको बारेमा बार्सिलोनाको व्यवहार फुटबलको लागि सकारात्मक होइन। भविष्यमा उनीहरू सतर्क रहोस् भन्ने आशा गर्छु।’