यूईएफएसँग ४.५ अर्ब युरो क्षतिपूर्ति माग्दै रियल

काठमाडौं। धेरै वर्षदेखि चलेको कानुनी लडाइँ र असफल वार्तापछि रियल मड्रिड र युरोपियन सुपर लिगका पछाडि रहेको संस्था ‘ए२२ स्पोर्ट्स म्यानेजमेन्ट’ले युरोपेली फुटबल नियामक संस्था यूईएफएविरुद्ध ४.५ अर्ब युरो क्षतिपूर्ति दाबी गर्दै मुद्दा दायर गर्ने तयारी गरेको छ।

यो कानुनी कदम युरोपियन युनियनको एक ऐतिहासिक एन्टिट्रस्ट अर्थात् एकाधिकार विरोधी निर्णयमा आधारित छ। यसमा यूईएफएमाथि आफ्नो प्रभुत्वको दुरुपयोग गर्दै निष्पक्ष प्रतिस्पर्धा रोकेको आरोप लगाइएको थियो।

सुपर लिग परियोजनालाई कुनै समय फुटबल इतिहासकै सबैभन्दा विवादास्पद पहल भनिएको थियो। अब त्यो परियोजना फेरि शीर्ष समाचार बनेको छ र यसपटक यसको जोखिम अझ गहिरो देखिन्छ।

स्पेनको ‘एएस’ पत्रिकाको रिपोर्ट अनुसार रियल र ए२२ स्पोर्ट्स म्यानेजमेन्टले ४.५ अर्ब युरोको क्षतिपूर्तिमा यूईएफएको एकाधिकारका कारण गुमाइएको नाफा, प्रतिष्ठाको क्षति र प्रतिस्पर्धात्मक हानि भनेको छ।

कानुनी तयारीका क्रममा दुवै पक्षका वकिलहरूले मुद्दाको प्रारूप तयार गरिरहेका छन्। महिनौंको असफल छलफल र बैठकहरूपछि उनीहरूले अब आक्रामक कानुनी कदम चाल्ने निर्णय गरेका हुन्।

हालै मड्रिडस्थित अदालतले यूईएफएको अपिल खारेज गर्दै फैसला सुनाएको थियो। फैसलामा यूईएफएले युरोपियन युनियनको प्रतिस्पर्धा सम्बन्धी कानुन गम्भीर रूपमा उल्लङ्घन गरेको ठहर छ।

उक्त निर्णयलाई रियलका अध्यक्ष फ्लोरेन्टिनो पेरेजले आफ्नो दीर्घ संघर्षको हरियो बत्ती मानेका छन्। उनका अनुसार अब न्याय पाउने र यूईएफएको अवैध नियन्त्रणका कारण क्लबले गुमाएको आम्दानी फिर्ता पाउने समय आएको छ।

२०२१ को अप्रिलमा युरोपका ठूला १२ क्लब रियल मड्रिड, बार्सिलोना, म्यानचेस्टर युनाइटेड, युभेन्ट्सलगायतले मिलेर युरोपियन सुपर लिग सुरु गर्ने योजना बनाएका थिए।

यस प्रतियोगिताको उद्देश्य यूईएफए च्याम्पियन्स लिगको विकल्प बनाउने र क्लबहरूलाई बढी आम्दानी र स्वतन्त्र संरचना उपलब्ध गराउने थियो। तर, योजना सार्वजनिक भएको ४८ घण्टामै तीव्र विरोध सुरु भयो। समर्थकहरूको आन्दोलन, सरकारहरूको दबाब र यूईएफए–फिफाको धम्कीका कारण इंग्ल्यान्डका ‘बिग सिक्स’ क्लबहरू पछि हटे।

अन्ततः रियल र बार्सिलोना मात्र आफ्नो संघर्षमा अडिएका रहे। पेरेजको भनाइमा यूईएफए आफ्नो एकाधिकारको प्रयोग गरेर फुटबलमा नवप्रवर्तन र निष्पक्ष प्रतिस्पर्धा दुवैलाई रोक्दै आएको छ।

ए२२ का प्रमुख बर्न्ड राइखार्टको सहयोगमा उनीहरूले कानुनी संघर्षलाई नयाँ गति दिएका हुन्। सन् २०२३ को डिसेम्बरमा युरोपेली न्यायालय (सीजेईयू) ले यूईएफएको स्वीकृति प्रक्रिया युरोपेली कानुनविपरीत रहेको ठहर गरेपछि सुपर लिग पक्ष बलियो बनेको हो।

त्यसपछि स्पेनको उच्च अदालतले पनि सो निर्णयलाई समर्थन गर्दै यूईएफएले आफ्नो प्रभावको दुरुपयोग गरेको ठहर गरेको थियो। यही फैसला अहिले ४.५ अर्ब युरो क्षतिपूर्तिको आधार बनेको छ।

यो फैसलापछि यूईएफए र ए२२ बीच वार्ता भए पनि कुनै सहमति हुन सकेन। प्रसारण अधिकार, प्रतियोगिता संरचना र आम्दानीको बाँडफाँडका विषयमा सहमति नजुट्दा वार्ता भंग भयो। रियल र ए२२का अनुसार यूईएफए जानाजानी समय खर्च गर्दै कुनै समाधान चाहँदैन। यसबीच बार्सिलोनाका अध्यक्ष जोआन लापोर्टा भने यूईएफएसँग सम्बन्ध सुधार्ने प्रयासमा छन्।

उनले पीएसजीका अध्यक्ष नासेर अल-खेलाइफी र यूईएफए प्रमुख अलेक्जान्डर सेफेरिनसँग भेट गरेर सम्झौताको सम्भावनाबारे छलफल गरेका छन्।

तर, फ्लोरेन्टिनो पेरेज यूईएफएविरुद्धको यो कानुनी निर्णयलाई आफ्नो जितको रूपमा देखिरहेका छन्। उनको दृष्टिकोणमा यूईएफएको एकाधिकारले क्लबहरूको स्वतन्त्रता, आर्थिक विकास र प्रतिस्पर्धात्मक अवसरलाई सीमित गरेको छ।

रियलले मागेको क्षतिपूर्तिमा गुमाएका व्यापारिक अवसर, प्रसारण आम्दानी र सन् २०२१ देखि यूईएफएको हस्तक्षेपका कारण ब्रान्ड इमेजमा परेको असरको मूल्य समावेश छ।

यूईएफएले भने अदालतको निर्णयले सुपर लिग परियोजनालाई वैधानिकता नदिएको बताएको छ। संस्थाले आफ्नो २०२२ मा स्वीकृत नयाँ अनुमति प्रक्रिया युरोपेली कानुनसँग पूर्ण रूपमा मेल खाने दाबी गरेको छ।

यूईएफएले युरोपेली फुटबलको एकता र प्रतिस्पर्धात्मक सन्तुलन कायम राख्न प्रतिबद्ध रहने बताएको छ। तर, यो कानुनी लडाइँ अब पैसाको मात्र होइन—फुटबलमा शक्ति, नियन्त्रण र भविष्यको दिशाबारे पनि निर्णायक परीक्षा बन्न गएको छ।

यदि रियलले यो मुद्दा जित्यो भने युरोपेली फुटबलको आर्थिक र प्रशासनिक संरचना एक नयाँ युगमा प्रवेश गर्नेछ।