चेल्सीलाई सिजनको पाँचौं रातो कार्ड

काठमाडौं। चेल्सीले मोलिनिएक्स मैदानमा वुल्भरह्याम्प्टनलाई ४–३ ले हराउँदै लिग कपको क्वार्टरफाइनलमा प्रवेश गरेको छ।

तर, यो जित सजिलो रहेन। प्रशिक्षक एन्जो मारेस्काको टोलीले यस सिजनको पाँचौं रातो कार्ड समेत पाएको छ। यसले क्लबको अनुशासनमा प्रश्न उठाएको छ।

पहिलो हाफमा चेल्सीले प्रभावशाली प्रदर्शन गर्दै ३–० को अग्रता लिएको थियो। एन्ड्रे सान्टोस, टाइरिक जर्ज र एस्टेभाओबाट गोल आएका थिए। तर, दोस्रो हाफमा वुल्भ्सले उत्कृष्ट पुनरागमन गर्दै टोलु अरोकोडारे र डेभिड मोलर वुल्फका गोलमार्फत अन्तर घटायो।

घाइते भएर फर्किएका लियम डेलापले ८६औं मिनेटमा दोस्रो पहेंलो कार्ड पाएपछि रातो कार्ड खाँदै मैदान छोडे। त्यसपछि जेमी गिटेन्सले चेल्सीको चौथो गोल गर्दै जित सुनिश्चित गरे।

अन्त्यमा वुल्फले अतिरिक्त समयमा दोस्रो गोल गरे। तर, प्रिमियर लिगको अन्तिम स्थानमा रहेको वुल्भ्सका लागि त्यो सान्त्वना मात्र बन्यो।