गोलको भोको रोनाल्डो

काठमाडौं। सर्वकालीन सर्वाधिक गोलकर्ताको कीर्तिमान धेरै अघिदेखि आफ्नै नाममा राखेका क्रिस्टियानो रोनाल्डो अब १००० गोलको लक्ष्यतर्फ तीव्र गतिमा अघि बढिरहेका छन्।

पोर्चुगाली सुपरस्टारले आइतबार आफ्नो करिअरको ९५०औं गोल गरेका छन्। साउदी प्रो–लिगमा अल–नासरले अल हज्मविरुद्ध खेल्दा २–० ले जित हासिल गर्‍यो। खेलको सुरुआतमै जोआओ फेलिक्सले अल–नासरलाई अग्रता दिलाए।

दोस्रो हाफमा रोनाल्डोले गोल गर्दै आफ्नो ९५०औं उपलब्धि पूरा गरे। यो सिजनमा लिगमा उनको यो छैटौं गोल हो। रोनाल्डोले यी ९५० गोल पाँच क्लब र पोर्चुगाल राष्ट्रिय टोलीका लागि गरेका हुन्।

उनले स्पोर्टिङ सीपीबाट करिअर सुरुआत गरेका थिए। त्यस क्लबका लागि ५ गोल गरे। इङ्लिस क्लब म्यानचेस्टर युनाइटेडका दुई सिजनमा १४५ गोल गरे। स्पेनिस क्लब रियल मड्रिडका लागि सबैभन्दा धेरै ४५० गोल गरे।

इटालियन क्लब युभेन्ट्सका लागि १०१ र हालको क्लब अल–नासरका लागि १०६ गोल गरेका छन्। यसबाहेक उनले पोर्चुगाल राष्ट्रिय टोलीको जर्सीमा १४३ गोल गरेका छन्।

९५०औं गोल पछाडि रोनाल्डोले आफू अझ धेरै गोल गर्न तयार रहेको सन्देश दिएका छन्। उनले इन्स्टाग्राममा लेखे,‘टिमलाई जिताउन र ९५० गोलको माइलस्टोन पार गर्न पाउँदा खुशी छु। अझ धेरै गोलका लागि सधैं भोकै छु।’

केही दिनअघि अल–नासरले एएफसी कपको खेलका लागि भारत भ्रमण गरेको थियो। तर, रोनाल्डो त्यस यात्रामा सहभागी नभएपछि खेल स्थगित भएको थियो। अब उनीहरूको अर्को खेल २८ अक्टोबरमा किंग्स कप अफ च्याम्पियन्समा अल इत्तिहादविरुद्ध हुनेछ।

त्यसपछि १ नोभेम्बरमा लिगमा अल–फेइहाविरुद्ध भिड्नेछ।