बंगलादेश र वेस्ट इन्डिजको खेलको एक इनिङ्समै चार कीर्तिमान

काठमाडौं। मिरपुरको कालो पिचलाई लिएर धेरै आलोचना भइरहेका बेला बंगलादेश र वेस्ट इन्डिजबीचको दोस्रो एकदिवसीय खेलमा चार उल्लेखनीय कीर्तिमान बनेका छन्।

वेस्ट इन्डिजले वनडे क्रिकेटको ५४ वर्षे इतिहासमा पहिलोपटक सम्पूर्ण ५० ओभर स्पिनरमार्फत बलिङ गराएको छ। यसअघि श्रीलंकाले तीनपटक ४४ ओभरसम्म स्पिन बलिङ गराएको थियो।

यो बंगलादेशमा पनि पहिलोपटक एक इनिङ्समा सबैभन्दा बढी स्पिन बलिङ भएको हो। त्यति मात्र होइन, वेस्ट इन्डिजले आफ्नो वनडे इतिहासमै पहिलोपटक दुई प्रान्तबाट स्पिन बलिङ सुरु गर्‍यो।

टोलीमा रहेका दुई तीव्र गतिका बलर जस्टिन ग्रिभ्स र शेर्फान रदरफोर्डलाई एक ओभर पनि बलिङ गर्न दिइएन। टोलीले पाँच जना स्पिनरमार्फत नै पूरा इनिङ्स बलिङ गर्‍यो।

बंगलादेशविरुद्ध पार्टटाइम स्पिनरको रूपमा बलिङ गर्न आएका लिक आथानेजले पनि इतिहास रचे। उनले यसअघि वनडे करिअरमा जम्मा चार ओभर मात्र बलिङ गरेका थिए। तर, यस खेलमा उनले पूरै १० ओभर बलिङ गर्दै १४ रन दिए र दुई विकेट लिए।

यो बंगलादेशविरुद्ध १० ओभर बलिङ गरेर सबैभन्दा किफायती प्रदर्शन हो। यसअघि पाकिस्तानका मोहम्मद हफिजले १० ओभरमा १५ रन दिएका थिए।

सुस्त ब्याटिङको इनिङ्सबीच रिशत हुसैनले आक्रमक खेल्दै अर्को कीर्तिमान बनाए। उनले १४ बलमा ३९ रन प्रहार गर्दै २७८.५७ को स्ट्राइक रेट कायम गरे, जुन वनडे इतिहासमा बंगलादेशका खेलाडीले ३० वा सोभन्दा बढी रनको इनिङ्समा बनाएको सबैभन्दा उच्च स्ट्राइक रेट हो।

यसअघि यो कीर्तिमान मासरफे बिन मोर्तजा र शाकिब अल हसनका नाममा थियो। दुबैले १६ बलमा ४४ रन प्रहार गरेका थिए।