एमबाप्पेको गोलसँगै रियल शीर्षस्थानमा फर्कियो

काठमाडौं। किलियन एमबाप्पेको गोलमा रियल मड्रिड फेरि ला लिगाको शीर्ष स्थानमा पुगेको छ। गेटाफेको मैदानमा भएको खेलमा रियलले १–० गोलले जित निकाल्यो।

९ खेलपछि रियलको २४ अंक भएको छ। समान खेलबाट २२ अंकसहित बार्सिलोना दोस्रो स्थानमा रहेको छ। एमबाप्पेले नै खेलको एक मात्र निर्णायक गोल गरेका थिए। यस जितसँगै जाभी अलोन्सोको टोली पुनः अंक तालिकाको शिखरमा पुगेको हो। रियलले खेलभर दबदबा जमाए पनि पहिलो हाफमा गोल गर्न सकेन।

उनीहरूले ९ पटक प्रहार गरे तापनि गेटाफेका गोलरक्षकको उत्कृष्ट प्रदर्शनले गोल हुन पाएन। तर, दोस्रो हाफमा खेलको गति पूर्ण रूपमा बद्लियो। सात मिनेटको अन्तरालमै गेटाफेका दुई खेलाडीले रातो कार्ड पाए र त्यहीबीच एक गोल पनि भयो।

मैदानमा प्रवेश गरेको ४४ सेकेन्डमै गेटाफेका एलेन नियमले भिनिसियस जुनियरलाई कुहिनाले हिर्काउँदा सीधा रातो कार्ड पाए। त्यसको तीन मिनेटपछि नै रियलले गोल गर्‍यो। बदलिएको खेलाडी गिलरले दिएको पासबाट एमबाप्पेले सुन्दर गोल गरे।

८४औं मिनेटमा गेटाफेका अर्को खेलाडी एलेक्स सानक्रिसले भिनिसियसलाई फाउल गरेपछि दोस्रो पहेंलो कार्ड पाए र मैदानबाट बाहिरिए। उनले पहिलो पहेंलो कार्ड खेलको ७४औं मिनेटमा पाएका थिए।

दुई खेलाडी कम भएपछि गेटाफेले अन्त्यसम्म फर्कने मौका पाएन र हार बेहोर्नुपर्‍यो।