फेरि सबैभन्दा धनी फुटबलर बने रोनाल्डो

काठमाडौं। फेरि पनि सबैभन्दा बढी आम्दानी गर्ने फुटबलर बनेका छन्, क्रिस्टियानो रोनाल्डो।

फोर्ब्सले सार्वजनिक गरेको २०२५–२६ सिजनको सूचीमा उनले लगातार तेस्रोपटक शीर्ष स्थान कायम राखेका छन्। साउदी क्लब अल–नासरका तर्फबाट खेल्ने पोर्चुगिज स्टारको वार्षिक आम्दानी करिब २८० मिलियन अमेरिकी डलर रहेको छ।

यसमा तलब, बोनस र विज्ञापन वा तस्बिर सर्वाधिकारबाट हुने आम्दानी समावेश छ। गत एक दशकमा छैटौंपटक रोनाल्डो फोर्ब्सको सूचीमा सबैभन्दा धनी फुटबलर बनेका हुन्।

मैदानमा उनले करिब १३० मिलियन डलर कमाउँछन् भने मैदानबाहिर विभिन्न व्यावसायिक सम्झौताबाट थप ५० मिलियन डलर आम्दानी गर्छन्।

उनका पुराना प्रतिस्पर्धी लिओनल मेसी यसपटक पनि दोस्रो स्थानमा रहेका छन्। अमेरिकन क्लब इन्टर मियामी तथा अर्जेन्टिनी स्टारले क्लब खेलबाट ७० मिलियन डलर र मैदानबाहिरका विज्ञापन तथा ब्रान्ड सम्झौताबाट ४० मिलियन डलर कमाएका छन्।

सन् २०२२ मा मेस्सी फोर्ब्सको शीर्ष स्थानमा रहेका थिए। गतपटक तेस्रो स्थानमा रहेका ब्राजिली स्टार नेयमार जुनियर चोटका कारण लामो समयदेखि मैदान बाहिर छन्। यसपटक उनले शीर्ष १० मा स्थान बनाउन सकेनन्।

उनको अनुपस्थितिमा अल–इत्तिहादका करिम बेन्जेमा तेस्रो स्थानमा पुगेका छन्। उनको आम्दानी १०४ मिलियन डलर रहेको छ। गत वर्ष शीर्ष १० मा रहेका म्यानचेस्टर सिटीका केभिन डे ब्रुइना यसपालि सूचीमा छैनन्।

उनी हाल इटालियन क्लब नापोलीमा छन्। त्यसको सट्टा बार्सिलोनाका युवा स्पेनिस प्रतीभा लामिन यमलले पहिलोपटक शीर्ष १० मा स्थान बनाएका छन्। डेढ वर्षयता उत्कृष्ट प्रदर्शन गरिरहेका यमलको वार्षिक आम्दानी ४३ मिलियन डलर पुगेको फोर्ब्सले उल्लेख गरेको छ।