फेरि पेनाल्टीमा चुके रोनाल्डो

काठमाडौं। दुई महिनाअघि भएको दुर्घटनामा डिएगो जोटाको निधन भएपछि पहिलो पटक आफ्नै घरेलु मैदानमा खेलेको पोर्चुगलले शनिबार राति आयरल्यान्डलाई १–० ले हराउँदै भावनात्मक जित हासिल गरेको छ।

लिस्बोनको एस्तादियो जोसे आल्भालादेमा भएको विश्वकप छनोटको युरोपेली क्षेत्र समूह ‘एफ’को खेलमा पोर्चुगलले सुरुदेखि अन्त्यसम्म खेलमा प्रभुत्व जमायो। ७० प्रतिशत बल पजेसन राख्दै ३० वटा शट हाने, जसमा ६ लक्षित थिए। तर, गोलको बाटो खुल्न निकै ढिलो भयो।

खेलमा धेरै अवसर सिर्जना भए पनि पोर्चुगलले गोल गर्न सकेन। कप्तान क्रिस्टियानो रोनाल्डो पनि खासै प्रभावशाली देखिएनन्। उल्टै दोस्रो हाफमा पाएको पेनाल्टी मिस गरेर उनी केही समयका लागि खलनायक बने।

७५औं मिनेटमा पोर्चुगलले पेनाल्टी पायो। रोनाल्डोले गोलरक्षक कोइभिन केलेहरलाई विपरीत दिशामा पठाएका थिए। तर, आयरिस गोलरक्षकले अन्तिम क्षणमा खुट्टा उठाएर बल रोक्दै सानदार बचाउ गरे।

यो पेनाल्टी मिससँगै रोनाल्डोले फुटबल इतिहासमा सबैभन्दा धेरै पेनाल्टी मिस गर्ने नयाँ रेकर्ड बनाए। यद्यपि, सबैभन्दा धेरै पेनाल्टी लिनेको कीर्तिमान पनि उनको नाममै छ।

खेल निर्धारित ९० मिनेटसम्म गोलरहित रह्यो। तर, इन्जुरी समयको पहिलो मिनेटमा रुबेन नेभेस नायक बने। दिवंगत साथी जोटाको २१ नम्बरको जर्सी लगाएर मैदानमा उत्रिएका अल हिलालका यो मिडफिल्डरले हेडरमार्फत निर्णायक गोल गरे।

यो गोलसँगै उनले पोर्चुगलको जर्सीमा पहिलो पटक गोल गर्न सफल भएका हुन्। सन् २०१५ मा राष्ट्रिय टिममा डेब्यु गरेका नेभेसले आफ्नो ५९औं खेलमा आएर पहिलो गोल गरे र त्यसलाई दिवंगत जोटालाई समर्पण गरे।

यस जितसँगै पोर्चुगलले विश्वकप छनोटको तीनै खेल जित्दै पूर्ण ९ अंकसहित समूह ‘एफ’को शीर्ष स्थान कायम राखेको छ। दोस्रो स्थानमा रहेको हंगेरीले समान खेलबाट ४ अंक जोडेको छ।