फेरि मेसीको 'डबल' गोल, एक असिस्ट
काठमाडौं। इन्टर मियामीका कप्तान लिओनल मेसीले दुई गोल र एक असिस्ट गर्दै आइतबार बिहान एटलान्टा युनाइटेडमाथि ४–० को फराकिलो जित दिलाएका छन्। यस जितसँगै इन्टर मियामीले प्लेअफको पहिलो चरणका लागि होम–फिल्ड एडभान्टेज सुनिश्चित गरेको छ।
खेलको ३९औं मिनेटमा बाल्तासार रोड्रिग्वेजको पासमा मेसीले पहिलो गोल गर्दै मियामीलाई अग्रता दिलाए। त्यसपछि दोस्रो हाफ सुरु भएको सात मिनेटमै जोर्डी आल्बाले दोस्रो गोल गरे।
३६ वर्षीय स्पेनी डिफेन्डर आल्बाले यसअघि नै सिजनको अन्त्यसँगै सन्न्यास लिने घोषणा गरेका छन्। क्लबले उनको अन्तिम घरेलु खेलमा बिदाई समारोहको आयोजना पनि गर्यो। मेसीले आल्बाको गोलमा असिस्ट दिँदै आफ्नो १८औं असिस्ट पूरा गरे। योसँगै उनले सान डिएगो एफसीका एन्डर्स ड्रेयरसँग लिगको असिस्ट सूचीमा बराबरीमा गरेका छन्।
६१औं मिनेटमा लुइस सुआरेजले गोल गर्दै स्कोरलाई ३–० पुर्याए। त्यसपछि खेलको ८१औं मिनेटमा आल्बाको पासमा मेसीले दोस्रोपटक जाली चुमाउँदै स्कोरलाई ४–० बनाए। यो मेसीको सिजनको २६औं गोल हो, जसले उनलाई लस एन्जलस एफसीका डेनिस बुआङ्गा भन्दा दुई गोल र न्यासभिलका स्याम सर्जभन्दा तीन गोलले अघि राखेको छ। नियमित सिजनमा अब एक मात्र खेल बाँकी छ।
मेसीको यस सिजनमा कुल ४४ गोल योगदान (२६ गोल र १८ असिस्ट) पुगेको छ, जुन मेजर लिग सकर लिग (एमएलएस) इतिहासमा दोस्रो सर्वाधिक हो। यसअघि २०१९ मा एलएएफसीका कार्लोस भेलाले ४९ योगदान (३४ गोल र १५ असिस्ट) गर्दै रेकर्ड बनाएका थिए।
इन्टर मियामीका गोलकिपर रोको रियस नोभोले तीन बचाउ गर्दै यस सिजनको तेस्रो क्लिन सिट कायम गरे। यस जितपछि इन्टर मियामी र एफसी सिनसिनाटी दुवैको अंक संख्या ६२ पुगेको छ, जसले पूर्वी सम्मेलनको दोस्रो स्थानका लागि प्रतिस्पर्धा अझ रोचक बनाएको छ।
मियामीले अब नियमित सिजनको अन्तिम खेल न्यासभिल एससीविरुद्ध खेल्नेछ। एटलान्टा युनाइटेडले डी.सी. युनाइटेडसँगको खेलमार्फत पूर्वी सम्मेलनको पुछारबाट माथि उठ्ने प्रयास गर्नेछ।
